Irak-imi innaallagissiorfiit unittooqqapput

Irakimi innaallagissiorfiit aserortoorsimapput nunallu immikkoortuini innaallagissamik pilersuiffiit qaminneqarsimasut Politiken allappoq.

-Imminut toqoriaatigaluni qaartartumeerinerit sakkutuullu upperisarsiornikkut immikkoorniat imminnut sorsuuttorpassuit Irakimi pisuni naalliunnartorujussuusarput. Massakkulli pisoq peqqarniisaarfiunngikkaluarluniluunniit sussaanngilaq, aviisiliortoq Flemming Ytsen allappoq.

Irakimi ikummatissaqarnermut ministereqarfimmi atorfillit aviisimut Associated Pressimut oqarput, Irak tamakkerluni innaallagissamik pisariaqartitami affaanik pilersorneqartoq. Irak tamangajammi ulluni unnuanilu kingullerni marlunni sarfaaruttooqattaarsimavoq. Tamanna Bagdadimi illoqarfinnilu allani angisuuni imermik pilersuinermik eqquingaatsiarsimavoq.

-Ujaraannarnik sakkoqarallarnerup nalaanisulli inuuvugut. Irak-imi nunap immikoortuani Karbala-mi Bagdadip kujasissuaniittumi ulluni pingasuni innaallagiaqanngilaq.

Imeq mingutsinneqaqisoq nerisassallu asiunikut pissutigalugit inuunerput navianartorsiortuarpoq, irakimiu oqaluttuarpoq. Taanna niuffatarfinni atisanik inuuniutigalugu nioqquteqarniarsarivoq.

Nunarsuarmi uuliaqarfissuit annersaasa ilaat Irakimiikkaluartoq, tamaani ikummatissaqarneq pillugu oqartussaasut ajornartorsiutigeqaat. Benziina liiterimut massakkorpiaq 5 kroner 50 øreqarpoq, taamaammat inuit aningaasaateqarluartut kisimik biilitik orsersinnaavaat.

Aviisiliortoq Flemming Ytzen Politikenimi taama tassa allaaserisaqarpoq.