Irak-iliarnissaq unitsippaat
Arsaattartut kattuffiat GBU ippassaq nalunaarfigineqarpoq kalaallit angutit arsaattartut Kurdistanimi Viva World Cup-imut qaaqqusaajunnaartut. Tassani unammeqataasussaagaluarput nunat arsaattartut kattuffissuanni FIFA-mi ilaasortaanngitsut.
Unamminerit Irakimi kurdistan-imi pisussaapput juunip sisamaaniit juunip qulingiluaat ilanngullugu.
Saaffineqaqqaarnerminni GBU-meersut nassuiaatigisimagaluarpaat angalanermut GBU akissaqanngitsoq. Taamaakkaluartoq Viva World Cup-imiit qaaqqusissut attanneqarsimavoq aammalu Nunatsinniit Kurdistanimut utimullu angalanissaq aqqutaanilu akunninnermi aningaasartuutit aaqqissuisut akilerumasimagaluarpaat.
Maannali aaqqissuisut paasilersimagunarpaat inuit 18-it Nunatsinniit Kurdistanimut utimullu angalatinniarnerat qanoq akeqassanersoq. Ippassami GBU siulittaasua Lars Lundblad pakatsiseqalugu nalunaarfigaat qaaqqusigaluarneq utertinneqartoq.
Suliap ingerlanera GBU-mit assut isornartorsiorneqarpoq.
- Kalaallit arsaattartut eqqarsaatigalugit isuamqarpugut misigisassamik pissanganartumik arsaarneqarnerat pissusissamisuunngitsoq, Lars Lundblad taama oqarpoq. Taassuma Viva World Cup-imik aaqqissuisut qinnuigisimavai qaaqqusissutip taamaatinnera nassuiaqqullugu.
