Iqalunni oqaluffik illuikkiatut isikkulik sananeqaqqilerpoq

Canadami oqaluffiit tusaamaneqarnerpaat ilaat, Iqaluit oqaluffiat, ukiut tallimat matuma siornatigut ikuallappoq, maannakkullu nutaammik assipaluanik sanasoqalerpoq.
aggustip 19-at 2010 11:48

Iqalunni oqaluffik ukioq 2005-imi ikuallammat, innuttaasut namminneerlutik komiteliorput oqaluffiliornissamullu aningaasanik katersilerlutik. Maannamullu aningaasat katersorneqartut 30 millioner koruunit atorlugit oqaluffik nutaaq sananeqarnialerpoq, nutaarsiassaqartitsivik National Post taama allaaserisaqarpoq.

Oqaluffik nutaaq sananeqartussaq illuikkiatut aamma isikkulerneqassaaq. Ilualu aamma kusassarneqartussaalluni aningaasat katersorneqartut ilaneqartarneri malillugit.

Oqaluffik 2005-imi ikuallattoq, 1970-imi tuluit Dronngiannit Elisabethimit atoqqaartinneqarpoq, kingornalu illoqarfiup ilisanaartigilerpaa.

Oqaluffik naggueqatigiit inuit kulturianneersunit atortoqarpoq, qimuttut qamutaat alterip seeqqumiartarfiata eqqaani inissisimapput, qinunerminilu seqqumiartarfiit puisit amiinik qallerneqarsimallutik.

Iqalunni oqaluffik, upperisarsioqatigiit anglikaskit kristumiuusut oqaluffiat, 80.000-init ilaaginnik ilaasortaqarpoq, taakkunannga nagguteqatigiit inuit 40.000-it ilaasortaallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq