Iqalunni ikuallagussaasut

Nunavummi Eqalunni inissiarsuarmi unnuaq ikuallattoqarmat inuit ikinnerpaamik marluk ikuallagussaapput. Inuit 300-t missaanniittut angerlarsimaffeerupput.
Allattoq Carla Davidsen
februaarip 28-at 2012 06:18

Ikuallannermut suna pissutaanersoq suli paasineqanngilaq. Ikuallannerli sapaatiummat unnukkut kingusissukkut aallartissimavoq, inissiamiipput ilinniarnertuunngorniarfimmi Arctic College-imi ilinniarnertuunngorniat inaat 22-t.

Inneq siaruaatipiloorpoq, najugallillu atisatik atukkatik kisiisa atorlugit qimarrapput. Silataanilu 50-inik issippoq.

Angerlarsimaffeeruttunit 300-nit meeqqat 50-it missaanniipput. Najugallit qimagussorneqareerput, atuarfimmi inissiap qanittuaniittumi inissinneqarallarlutik.

Canadami naggueqatigiit Inuit suleqatigiiffianni, Inuit Tapiriit Kanatami-mi, præsidentip, Mary Simonip, ikuallarujussuartoqarnerani angerlarsimaffeeruttut misiginneqataaffigai.
Canadami innutaasut tamaasa ilutigalugu aamma kaammattorpai, angerlarsimaffeeruttorpassuit ikiuiniaqatigiiffik Røde Kors aqqutigalugu atisanik allanillu ikiuutaasinnaasunik tuniseqqullugit - isseqimmallu ukiorsiutit eqqarsaatigeqquneruai.

Timmisartuutileqatigiiffik First Air ikiuutissanik akeqanngitsumik assartuiniarluni aamma neqerooruteqarpoq.

Ikuallanneq qanoq aallartissimanersoq suli paasineqanngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq