Ippigusullutik sulisut amerlavallaaqaat

Sullivinnik nakkutilliisoqarfik, illoqarfinni qulingiluani suliffeqarfinni nakkutilliinerminut atatillugu pissutsinut aarlerinartunut amerlasuunut peqqusuteqarpoq. Erngerluni tallimanik naalakkiuteqarnermi saniatigut ulloq unnuarlu paaqqinnittarfinni 50-iusuni katillugit 101-inik peqqussuteqarpoq. Sullivinnik nakkutilliisoqarfimmi nakkutilliisoq Klari Lennert oqarpoq:

-Illoqarfiit qulingiluat tikeraarneranni peqqussutit 100 missaanniittut qisuariaatigaavut. Peqqussutit suliffeqarfinni ippinnartoqarsimappat aaqqiinissamut piffissaliinertalimmik qisuariaataasarput.

Peqqussutigineqartut saniatigut tallimariarluni inngertumik naalakkiisoqarsimavoq, taakkulu sillimaniarnermut, soorlu ikuallattoornissamut tunnganerusut Klari Lennert oqarpoq.

Suliffeqarfippaalussuarni sulisut sulinerminni atukkatik tunulliutillugit sullitaminnik salliutitsisarnerat ajornartorsiutaasarpoq.

- Sulisut imminnut puigoqqajaasarput. Sullivimmi isumannaallisaaneq ataatsimiinnerni ilaatinneqartanngilaq, ilaatigullu ingerlaneq ajorluni, tamakku peqqutaallutik taamatut inissisimasoqarpoq peqqinnartutullu oqaatigineqarsinnaanani.

Sulisut qitilullutik nukimminnilluunniit sukattooqqallutik sulisut akuerineqarsinnaanngillat, sulinermilu tarnikkut atukkat aamma sammineqarsimapput.

-Sammivaguttaaq nakuusertarnerit imaluunniit siorasaartittarnerit, naammattoorsimallugillu sulisut qanoq qisuariartassanerlutik nalusaraat. Imminnut paarinissartik pillugu pilersaarusiortarsimanngillat.

Kommunet Namminersornerullutillu Oqartussat sulisumik atugaannut atatillugu naammassinninnerat pitsaanerusariaqartoq Nakkutilliisoqarfimmiut isumaqarput.

- Timikkut tarnikkullu atugarisat suliffeqarfinni annertunerusumik suliniuteqarfigineqartariaqarput, qullersat annertunerusumik tapersersuinissaat pisariaqarpoq, sullivimmi isumannaallisaanermut ataatsimiititaliap ataavartumik ingerlanissaa siunertaralugu.

Klari Lennert oqarpoq sulinermut atatillugu politikki amigaataasorujussuusoq.

- Sulinermi isumannaallisaaneq sukumiinerusariaqarpoq, ippigusullutik sulisut amerlavallaaqaat.