Iperagaanissaralua kinguartippoq
Angut 26-nik ukiulik persuttaasimasutut Pinerluuteqarsimasunut Inissiisarfimmiittussanngorlugu eqqartuussaq, persuttaaqqissimanini peqqutigalugu iperagaangallarnavianngilaq.
Allattoq Louise M. Kleemann
Nuummi politiit pineqaatissinneqarsimasunut inissiisarfimmit qimaasoqarsimaneranik  arfininngornerup ullaassaanni nalunaarfigineqarput.
Nalunaaquttap akunneri sisamat missaat qaangiuttut politiit angutip aappaanit 38-nik ukiulimmit sianerfigineqarput. Arnaq nalunaarpoq aapparminit angummit tassannga 26-nik ukiulimmit persuttarneqarsimalluni.
Angut aapparminik persuttaasimasutut aappassaanik taamaasilluni unnerluutigineqarpoq.
Sinerissami pineqaatissinneqarsimasunut inissiisarfimmiit arlaannut nuunneqarnissani angutip massakkut naatsorsuutigisariaqalissavaa.