Nuugaatsiarmiut Illorsuarmiullu oqaloqatigerusuppai
Sara Olsvigip Nuugaatsiarmiut Illorsuarmiullu oqaloqatigiinnissamut taamaammat Uummannami aggersarpai, nunaqarfinnimimi taakkunani najugallit amerlanersaat qimagussorneqarnermi kingorna tassani najugaqalersimammata.
Nuugaatsiami juunip ulluisa 17-ianni ajunaarnersuaqarmalli Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoqarfik innuttaasunut eqqugaasunut qimagussorneqartunullu suliniuteqarnermut peqataasimavoq.
Nuugaatsiarmiut Illorsuarmiullu tamanna tunuliaqutaralugu Sara Olsvigip tusarusuppai eqqorneqarsimasunut suliniutit qanoq nalilerneraat:
- Nuugaatsiarmiut Illorsuarmiullu qanimut naapillugit isumaginninnikkut suliniutit tapersersuinerillu qanoq misigisaqarfigisimaneraat tusagaqarfigissallugu pingaartippara. Ajunaarnersuaqarnerup innuttaasut atugaannut mumisitsisimanissaa qularnanngilaq piffissamilu aggersumi suliniuteqarnitta nanginnerani suut eqqumaffigissanerlugit toqqaannartumik paasisaqarfigerusuppara, Sara Olsvig oqarpoq.
Oqaloqatiginninneq Uummannami Atuarfik Edvard Krusep inersuaani februaarip ulluisa 13-ianni ualikkut nalunaaqutaq sisamaniit arfernup tungaanut pisussatut pilersaarutigineqarpoq.
