InuVoice-mi erinarsullammassarsiortoqalissaaq
Aaqqissuisut ullaap tungaani tusagassiortunik katersortitsimmata aperaagut sooq taama ittumik aaqqissuerusulersimanersut.
- Julie Berthelsen Danmarkimi unammeqataammalli tulluarunartilersimavarput Kalaallit Nunaanni aamma taamaaliortoqarnissaa. Ukiorpassuit kiisa qaangiupput tamatuma eqqarsaatitsinniittuarnera, massakkullu taamatut aalajangernitsinnut aamma peqqutaaqataavoq X-Faktoreqaqqammernera, Alex Andersen oqarpoq.
Erinarsullammammik naassaarniarluni unammisitsineq InuVoice aappaagu januaarimi TV-kkut aallakaatinneqarluni aallartissaaq marsimilu naammassineqassalluni.
Aaqqissuisut oktoberimi novembarimiluunniit Tasiilami erinarsortitsisaqattaarlutik aallartissapput, kingorna Qaqortuliassapput Nuummukassallutik aammalu Sisimiuni Aasiannilu erinarsortitsissallutik.
- Sinerissamut angalaniartussaassaagut illoqarfinnut annernut tassanilu peqataarusuttut InuVoice.com aqqutigalugu ilanngussinnaapput, naliliisartoqassaaq saniatigullu aamma sms-ikkut taasisoqartassalluni, Alex Andersen oqarpoq.
Taanna aperaarput peqataasussanut suut piumasaqaataassanersut.
- Kikkut tamarmik peqataasinnaassapput, soorunalimi aamma sassarniartunut piumasaqaatitaqassaaq, taakkulu piumasaqaatit www.InuVoice.com-imut piffissami qaninnerni ilanngutissavagut, Alex Andersen oqarpoq.
Aperaarput kikkut dommeriussamaarnersut.
- Isertugaalaaraluarpoq kisianni inuit marluk taasinnaavakka tassalu uanga Alex Andersen dommeriunissannut toqqarneqarsimavunga aamma Kimmernaq Kjeldsen, oqarpoq.
Apereqqipparput ajugaasumut qanoq kinguneqartitsisoqassanersoq.
- Saqqummersitsisussaassaaq immiussillunilu taanna præmie-tut saarliussaaq, akivoq.
Alex Andersen erseqqissaavoq TV-kkut aallakaatitassiat qulit KNR-TV-ikkut takutinneqassasut.
- Aallakaatitassiat arfinillit sinerissamiit immiussat malinnaaffigineqarsinnaapput, taavalu marluk Kangerlussuarmi mellemrundtit taavalu workshop-it assigiinngitsullu aamma taakku malinnaaffigeriarlugit finale ajugaaniutivinnerit Katuami Nuummi ingerlanneqartussaq malinnaaffigineqarsinnaassaaq, taama oqarpoq InuVoice-mik aaqqissueqataasoq Alex Andersen.
TV-ikkut assilisat KNR-miit assilineqassanngillat nunatsinni namminersorluni TV-kkut assiliisartoq danskiusoq Ulrik Bang assiliisuutinneqassaaq.
Nipaalu immiussisarfiutilimmit Alex Andersenimit nipigissarneqassapput.
