Inuvialuit puisit amiinik EU-mut tunisaqaqqissinnaalersut
Puisit amiinit pisunik EU-mut tunisaqaqqusaajunnaarsitsineq Inuvialunnik eqquisimagaluarpoq, maannali tassa tunisaqaqqilersinnaalerlutik.
Puisit amiisa EU-mut tunineqarsinnaajunnaarsinneqarnerata atuukkunnaarsinneqarnissaa, Northwest Territoriesimi naalakkersuisut ukiuni kingullerni arfineq-marlunni sukataarutigisimavaat, Inuvialunnilu naalakkersuisut sukataaruteqarnerat pissutaalluni Inuvialunni naggueqatigiit Inuit puisit amiinik EU-mut maanna tunisaqaqqissinnaalerput.
Nunat inoqqaavisa puisit amiinik tunisaqaqqusaannginnermut ilaatinneqannginnissaat EU-p aalajangigaa aallaavigalugu inuvialuit taamaasillutik EU-mut tunisaqarsinnaanngorput.
Inuvialuit puisit amiinik EU-mut tunisaqaqqissinnaalernissaat EU-mit akuersissutigineqartoq, Duane Smithip, Inuvialuit Regional Corporationimi pisortap, APTN Newsimut oqaatigaa, Inuvialuillu piujuaannartitsinissaq aallaavigalugu isumannaatsumillu puisinniartartuunerat aamma oqaatigalugu.