Inuuteq Storch saqqummersitsivissuarmi saqqummersitsisoq: Nunatsinnut periarfissarujussuuvoq

Eqqumiitsuliortoq, assiliisartorlu Inuuteq Storch ullumi makkunani oqaluttuarisaanermut ilannguppoq.

Taannami nunarsuarmi saqqummersitsisarfiit pingaarnersaata ilaanni Venedig Biennalen 2024-mi saqqummersitsivoq.

Inuuteq Storch nunatsinneersunit siullerpaalluni Danmark eqqumiitsulianik saqqummersitsivimmi Danmarkimit saqqummersitsisussatut Statens Kunstfondimit toqqarneqarpoq. Taassuma saqqummersitsinissani siornali piareersalerpaa.

- Oqiliallannaqaaq, aammali tupinnarluni. Biennalen eqqumiitsulianik saqqummersitsivissuarni tusaamaneqarnerpaanut ilaavoq, taamaammat najuuttut qiimmassimaaqaat, Inuuteq Storch Venedigimit oqarasuaatikkut oqarpoq.

Eqqumiitsulianik saqqummersitsineq taanna ukioq allortarlugu saqqummersitsiviusarpoq, tassanilu nunat 40-t – ilaatigut Danmark saqqummersitsiveqartarlutik. Saqqummersitsivissuarmi pingaarnertut saqqummersitsisoqartarpoq nunallu ataasiakkaat saqqummersitsiviini assigiinngitsunik saqqummersitsisoqartarluni.

Nammineq assiliartaliineq

Danskit eqqumiitsulianik saqqummersitsivianni allagartaq “Danmark” qallerlugu allagartaq “Kalaallit Nunaat” taarsiunneqarpoq.

Saqqummersitsiffimmi Inuuteq Storchip saqqummersitai “Rise of the Sunken Sun” nivingapput. Taassuma saqqummersitai suliat assigiinngitsut arfiniliupput – ilaatigut Inuuteq Storchip Sisimiuni inuunermit, Qaanaami piniartuunermit assilisaanik, assiliisartup ilaqutaasa assinginik toqqorsivimmeersunit nunatsinnilu assiliisartup siulliup, John Møllerip assilisai ilaapput.

Inuuteq Storchip saqqummersitsinermini nunatta assigiinngisitaartuunera oqaluttuarerusuppaa. Oqaluttuarisaanermimi nunatsinnik inuiaqatigiinnillu assiliisartut nunatta avataaneersuunerusarput.

- Suliat tamarmik kalaallit kulturiannut, oqaluttuarisaanerannut kinaassusaannullu attuumassuteqarput. Kalaallit kulturiata Biennalenimi saqqummersinnera tulluusimaarutigaara, taanna oqarpoq.

Danmark danskit saqqummersitsivianni Kalaallit Nunaat-nik taarserneqarpoq. Assi © : Statens Kunstfond

Tamatuma saniatigut saqqummersitsineq nunatsinni eqqumiitsuliat eqqumiitsuliortullu sammineqarnerulernissaannik periarfissiissasoq assiliisartup neriuutigaa.

- Nunarsuaq tamarmi malinnaavoq. Taamaammat saqqummersitsineq taamaattoq nunatsinnut periarfissaallunilu nuannaarutissaavoq. Periarfissaq manna atorluartariaqarparput, Inuuteq Storch nunanit tamalaanit tusagassiorfinnit arlalinnit ulluni kingullerni oqaloqatigineqartarsimasoq oqarpoq.

Politikkikkut salliutitsineq amigaataasoq

Periarfissarlu nunatsinni politikerit suli atorluarpallaanngikkaat saqqummersitsinermullu tapersersuinikippallaartut taanna isumaqarpoq.

- Danskit kultureqarnermut ministeriat saqqummersitsinerma ammarneqarnerani oqalugiarpoq, uangalu naalakkersuisora (Aqqaluaq B. Egede aaqq.) pisinnaanani nalunaarluni. Nunatsinnili inuiaqatigiit politikerillu akornannit tapersersuisoqarpiannginnera nikalluallannarpoq, taanna oqarpoq.

Inuuteq Storchip assilisai nunatsinni assiliisartup siulliup, John Møllerip assilisaasa toqqorsivimmeersut saniani nivingapput. Assi © : Statens Kunstfond

Inuuteq Storchip saqqummersitsinera pisortatigoortumik sisamanngornermi ammarneqarmat kalaallit nipilersortartut Kimmernaq, Mike Thomsen Andachanilu tusarnaartitsipput.

Danskit Vendig Bennalenimi saqqummersitsivianni kingullermi saqqummersitsisoqarmat takusaasut 800.000-it missaanniipput.

Inuuteq Storchip saqqummersitai Biennalenimi novembarip 24-ata tungaanut takusarneqarsinnaapput. Tamatuma kingorna Københavnimi Fotografisk Centerimi aamma Gôteborgimi Hasselbladstiftelsenimi saqqummersinneqassapput.