Inuusuttut suliffissaaleqisut ilisimaneqartunit amerlanerupput
Nunat Avannarliit Ministeriisa Siunnersuisoqatigiiffiata Københavnimi aqagu ataatsimeersuarnerani Nunani avannarlerni inuusuttut suliffissaaleqinerat oqaluuserineqassaaq.
Nunani avannarlerni inuusuttut suliffissaaleqisut annertuumik amerlisimapput. Kalaallit Nunaanni inuusuttut suliffissaaleqisut aamma amerliartorput.
Kalaallit Nunaanni inuusuttut suliffissaaleqisut pisortatigut kisitsisinit saqqummiunneqartunit amerlanerupput. Naatsorsueqqissaartarfiup kisitsisini junimi saqqummiussaani takuneqarsinnaavoq inuusutttut 20-nit 24-nut ukullit akornanni suliffissaaleqisut amerlanersaasut. Naatsorsueqqissaartarfiullu uppernarsaarpaa kisitsisit tamakkiisumik pigineqannnnginerat.
Kommuneqarfik Sermersuumi Tungiuinermut immikkoortortaqarfimmi siunnersorti Edvard Mørch oqarpoq, nunaqarfinni inuusuttut suliffissaaleqisut nalunaarsorneqartarnerat nutarterneqartariaqartoq:
- Tassa siullermik IT-ip tungaatigut malinnaatitsiniarnerup nunaqarfinni suliniuteqarfigineqarsinnaanera pingaaruteqartutut isigivara. Ulluinnarnimi faxikkut nalunaarsuinerit suliaralugit unamminartarput, Edvard Mørch oqarpoq.
Inuusuttut suliffissaaleqisut tamakkiisumik nalunaarsorneqanngippata kingunerisinnaasai pillugit Edward Mørch ima oqarpoq:
- Tamakkiisumik iluamik nalunaarsorneqanngippata ilinniartitsinissamut pisariaqartitsineq qanoq annertutiginersoq ersarissaavigineqarsinnaanngilaq.
Ilanngullu nunaqarfinni inuusuttut suliffissaaleqisut tamakkiisumik nalunaarsorneqartalernisaat suli unamminartoqartoq, Edvard Mørch oqarpoq.
Inuusuttut suliffissaaleqisut tamakkiisumik nalunaarsorneqartalernissaat qaqugu pisinnaalissava?
- Uatsitulli kommunit allat unamminartortaqartippassuk, nunalu tamakkerlugu eqqumaffigineqanngippata taava takorloorneqarsinnaavoq nalunaarsuiniapiloortarnerit suli ukiumi ataatsimi marlunniluunniit malinnaaniapiloortinneqartut, Edvard Mørch oqarpoq.
