Inuusuttut suliffissaaleqinermit eqqugaapput

- Suliffissaq ajornaasannermik massakkut, inuusuttuulluni suliffissaaleqinartorujuuvoq, sulerusukkaluarluni uninngatitaarujuuinnaq qatsunnaasakkaluarpoq, Edgar Markussen 21-nik ukiulik Ilulissani suliffissarsiuussisarfimmi ullumi suliffissarsiortutut nalunaartoq taama oqarpoq.

Edgar Markussen ukiup ataatsip missaani suliffissarsiortutut nalunaartareerpoq, sulilu suliffissaaleqilluni. Taanna periarfissaqariaraangamilu imerniartarfinni bartenderisut paarlattaalluni sulisarpoq.

Kisimiinngilarlu Qaasuitsup kommuniani inuusuttoq suliffissaaleqisoq. Suliffissaaleqisut apriilimi nalunaarsorneqartut 1.255-iusut 45 procentii inuusuttuupput 15-it 25-illu akornanni ukiullit, tassa 571-iullutik.

Inuusuttut suliffissaaleqisut inuussutissarsiutinut ilinniagaqanngitsuusut ukiuni kingullerni immikkut maluginiarneqartalersut, Ilulissani suliffissarsiuussisarfimmi siunnersorti Hanne Anna Heilmann oqarpoq.

- Ukiut siulii eqqarsaatigalugit, atuarfitsialaqalereerneraninngaanniit massakkumut, ilinniagaqanngittut amerlapput, ilai piareersarfinniaraluarlutik inissaaruttoortut, praktikkerfissaaruttoortut (sungiusaatigalugu suliffik), ilinniagaqalernissaminnut karakteriminnik angummatinngitsoortut qinnuteqanngitsoortullu, Hanne Anna Heilmann inuusuttut suliffissaaleqisut pillugit taama oqarpoq.

Ilulissani piareersarfik ukiumut 50-inik atuartuuteqarsinnaavoq. Ukiamut 25-it aallartissapput, atualersussatullu utaqqisutut 44-t maanna allatseqqapput.

Inuusuttut ilinniagaqqanngitsut suliffissaaleqisut ilagaat,

Arnarajaq Kristensen 21-nik ukiulik siornatigut Qasigiannguani qalerallerisutut sulisimangaluarpoq, Ilulissanulli nuukkami novemberimit suliffissaaleqisutut nalunaartalerpoq.

- Qasunarpoq, uninngakatannarpoq angerlarsimaannarluni, Arnajaraq Kristensen oqarpoq, taanna TNI-imi allaffimmiutut ilinnialernissaminut qinnuteqareerpoq, ilinnialernissaminullu akuerisaasimanerluni tusagaqarnissaminut maanna utaqqivoq.  

- Neriunnartorujuuvoq, ingerlariaqqikkusunnarpoq, suliffissaqarani ilinniaqqikkusunnarnermut, Arnajaraq Kristensen oqarpoq.

Inuusuttoqataatalu Edgar Markussenip igasunngorniarnissani takorloortarpaa, ilinnialernissaminulli karakterini Piareersarfimmi pitsanngorsaqqaartariaqarlugit nalunngilaa.

- Aappaagu eqqarsaatingaara aallartinnissara, Edgar Markussen piareersarfimmut ukioq manna qinnuteqarnissaminut kingusinaareersoq taama oqarpoq.

Ilulissani inuusuttut suliffissaaleqisut tuluttut pikkorissarneqarnissaraluat aningaasassaaleqineq pissutigalugu taamaatiinnarneqartoq, suliffissarsiuussisarfimmit ilisimatitsissutigineqarpoq.