Inuusuttut sisamat Norgemut qitinnermik ilinniariartussanngorput
Aappaagu Norgemut angalasussat tassaapput, Ivalu Labansen, Palleq Johansen, Ann Katrine Kellmann aamma Nete Lyberth Lind. Taakkua Nuummi sapaatip akunnerani kingullermi qitinnermik festivaleqarnerani, siullerpaamik ingerlanneqartumi, OuterVision 2010-mik taaguutilimmi peqataapput.
Meeqqat sisamat Norge-mut angalanissamut toqqarneqartut, qitinnermik piginnaasaqartutut, Norgemi qitinnermik ilinniarfimmit Bårdar Danseakademi-mit nalilerneqarput, taamaattumillu aappaagu qitinnermik festevaleqarnissaanut Dance Explosion 2011-mi peqataanissamut angalanissaannut bilitsimik tunillugit. Norgemi qitinnermik ilinniarfimmi Bårdar Danseakademi-mi sapaatit akunnerini marlunni qitinnermik pikkorissartinneqassapput.
- Meeqqat taakkua sisamat qitinnermik festivalimi soqutiginnilluinnarlutik peqataapput, qitinnermillu takutitsinermi piginnaasaqarluarnerat takuneqarsinnaammat, piginnaasaminnik ineriartortitseqqissinnaanissaannik periarfissinniarpavut, Norgimi qitinnermik ilinniarfimmeersoq Kristin Berg oqarpoq.
Norgemi qitinnermik pikkorissartitsineq aappaagu aasakkut ingerlanneqassaaq.
Qitinnermik pikkorissarneq 4.500 koruuninik akeqartoq, meeqqat sisamat peqataasussat tunissutitut pissarsiaraat, taamaattorli Norgemut angalanissartik Norge-miinnerminnilu najugaqarnissartik nerisaqarnissartillu namminneq akilissavaat.
