Inuusuttut Savalimmiunut uteqquneqarput
- Savalimmiuni ivikkat qorsooqqinnerupput! Taama nalunaaruteqartut tassaapput Savalimmiuni suliffeqarfiit. Taamaattumik taakkua Savalimmiormiut inuusuttut angerlarnissaat anguniarlugu ullumikkut Københavnimi ussassaaripput.
Savalimmiormiut inuusuttut Danmarkimiittut ilagaat Loritha Hansen, Københavnip universitetiani ilinniartuusoq.
- Savalimmiuniit nuunnissara misilikkusulerakku København nuuffigaara illoqarfimmi taanna Savalimmiut avtaanniittuni nalunnginerpaagakku, Loritha Hansen oqarpoq.
Savalimmiut 49.000-it missaannik inoqarpoq. Savalimmiormiut Danmarkimut nuussimasut 7.500-uupput, amerlanersaallu ilinniagaqarniarlutik Danmarkimut nuussimapput. Taakkulu Savalimmiuni atorfissaqartinneqaqisut, Randi Frederiksbergip Thorshavnip kommunianit ussassaarinermi peqataasup oqaatigaa.
- Savalimmiut avataanut ilinniagaqarniarlutik nunani allaniittut utinngippata, fagitigut inuiaqatigiinnilu kinguariartortoqalissaaq, Randi Frederiksen oqarpoq.
Naak naalakkersuisut nutaat inuussutissarsiornermillu ingerlatsisut Loritha Hansenip Savalimmiunut uternissaa kissaatigigaluaraat, taassuma Danmarkimit qanittukkut nuunnissani naatsorsuutiginngilaa.
- Maani misilittagassarsioqqaarnissara naatsorsuutigaara, aammami aappara maani Københavnimi atorfeqarpoq. Maani ikinnguterpassuaqarpunga, ukiorpaalunnilu maaneereerama maani inuuneq sungiuppara, Loritha Hansen oqarpoq.