Inuusuttut pingasut taxartartumiit tillissimasutut tigusarineqarput
Pinerluttulerinermut inatsimmik unioqqutitsisimasutut pissutissalimmik politiinit pasisaallutik tigusarineqartut Nuummi eqqartuussivimmut sassartinneqarput, decembarillu 21-ata tungaanut tigummigallagassanngortinneqarlutik. Nuummi politiit taama nalunaaruteqarput.
Inuusuttut sisamat, angutit pingasut arnarlu ataaseq, Nuup illoqarfiata qeqqani, angalatitseqatigiiffiup Air Greenland Travelip silataani, marlunngornerup unnuaani ataatsip missaani taxanut ikipput.
Tassanngaanniit Nuup illoqarfiani sumiiffinnut assigiinngitsunut Qinngutsinnullu ingerlanneqareerlutik, Nuummi Blok K-p silataani, taxani aquttup aningaasivia 1000 koruuninik imalik tillippaat.
Tigusarineqartut marluk taamaangajattumik pinerluuteqarsimasutut siornatigut pineqaatissinneqarnikuupput, soorlu aamma inuusuttortaat 17-inik ukiulik politiinit ilisimaneqareerluni.
Taanna tillinniarsimasutut siornatigut pineqaatissinneqarnikuuvoq.
Nuummi taxartitsisup saassunneqarneranut atatillugu paasissutissiisinnaasut 10.000 koruuninik akissarsisinneqarnissaat, taxaatileqatigiiffiup Taxagutip nalunaarutigaa, politiilli oqarput suli akissarsisitsisoqarsimanngitsoq.
