Inuusuttut pinerluuteqartarnerat appangaatsiartoq
2014-imi pinerluttoqarnerani suliat 535-t inuusuttut 15-init 18-inut ukiullit akornanni ilaatigut aningaasanik pigisanillu tillinniarnerupput. Siornami 191-iusimapput.
Ikiliartornerallu politimesterip, Bjørn Tegner Bayip nuannaarutigaa tamannalu siunissamik ajunngitsumik takussutissiinerarlugu.
- Inuusuttut akornanni pinerluttuliornerit ukkatariinnarneqarsinnaasuugunik ikinnerpaanissaallu anguniarneqarpat taava tamanna siunissamut ajunngitsumik ineriartortoqarnissaanut tunngavissaqarluarpoq. Inuusuttummi uku ukioqqortusiartortussaapput inuusuttuunerminnilu pinerluuteqannginnissaat anguniarsinnaavarput, taamaalilluni ukioqqortusinerminni pinerluuteqanngiinnarnissaannut periarfissaqarluassaaq.
Kisitsit appariartornerat ilutigalugu Nunatta Danmarkimi nunanilu sanilliuffigisartakkatsinni kisitsisit nalingikannilerpai. Kisitsit pitsaasumik appariartornerat, Bjørn Tegner Bayip pingasunik pissutissaqarnerarpaa.
- Naak pinaveersaartitsarnivut kusanarnerpaanngikkaluartut pinaveersaartitsinermik suliaqarnermik ukkatarinninnerulerpugut. Politiit tungaanniinnaanngitsoq aammali suleqatigisatta tungaaniit ukiuni kingullerni tallimanit qulinut pinaveersaartitsinerit maanna kinguneqarluarput pinerluuteqarnerillu ikiliartorlutik.
Ataqatigiissaarineq pitsaanerussasoq
Tamatuma saniatigut inuuniarnerup pitsaassusaa qaffappoq tamannalu pinerluttoqartarneranut appariartortitseqataavoq. Politiillu suliat inuusuttunut tunngasut sukkanerusumik suliarineqarnissaat sammisimavaat tamannalu pinerluuteqarnerup akuersaarneqarsinnaannginneranut kingunerluuteqarsinnaaneranullu erseqqissaaqataavoq.
Ineriartorluarneq ukiut arfinilissaanik ingerlaannassappat pinaveersaartitsineq suli pitsaanerulersinneqartariaqarpoq.
- Qularnanngilaq pinaveersaartitsinermik suliaqarneq aqqutissaasoq, politiiniillu pinaveersaartitsineruinnarani. Isumaginnittoqarfimmit atuarfeqarfinniillu pinaveersaartitsinermik suliaqarluartoqarpoq, kisianni akornatsinni ataqatigiissaarilluarnerujussuussaagut suleqatigiillutalu taamaalioruttalu suli alloriaqqissinnaanerput ilimagaara.
Suliat 2017-imit 2018-imut 316-init 191-inut ikileriarsimapput.