Inuusuttut peqataanerulissappata allaanerusumik attaveqarfigisariaqarput
Taama oqariartuuteqarneq pivoq inuusuttut soqutiginninnerat killeqartoq paasinarsimmat.
- Tamatta nassuerutigisariaqarparput taanna periuseq nutartigassarujussuusoq, Vivian Motzfeldt oqarpoq.
Inuusuttut innuttaasunik ataatsimiitsitsisoqartillugu akuuneq ajorneri ilisimatuussutsikkut misissuinerup takutikkaa, ilisimatusartup oqaatigaa.
- Tamatumuuna takusinnaannguatsiarparput innuttaasunik akulerutsitsiniarneq iluaqutaanngitsoq, Anna-Sofie Skjervedal oqarpoq.
Taamaammallu ilisimatusartup innuttaasunik ataatsimiisitsinertut taallugu paasititsiniaasoqartarnera isornartorsiorpaa. Allannguisoqarnissaanullumi piffissanngorsorineqarpoq.
- Periusitoqaavoq immaqa ajornannginnerpaaq ilaatigullu immaqa piffissakilliornerup tunngavigisaanik annertoorujussuarmik atorneqartartoq, Vivian Motzfelt oqarpoq.
AAMMA ATUARUK Innuttaasunik ataatsimiisitsinerit atorsinnaanngillat
Piffissartik allamut atorusunneruaat
Inuusuttut soqutiginninnerisa killeqarsinnaasarnerat assigiinngitsunik pissuteqarsinnaasoq inuusuttut naapitagut naliliipput.
- Immaqa inuusuttut piffissaqanngippallaarput. Ilinniarlutik, timersorlutik, sulineq soqutigisallu allat. Tamakku tungaatigut immaqa piffissaqarsimanngillat, GUX-imi ilinniartoq Hanne Heilmann oqarpoq.
Peqataatinneqassappatalu innuttaasunut ataatsimiisitsisarnerit aqqutissaasorineqanngillat.
- Paasissutissanik amigartunik saqqummiussuisarneri taavalu inuusuttut atorluartagaat facebooki atorneqarneq ajorpoq. Inuusuttunut tassunga saqqummiussineq tulluarnerulernikuugami ullutsinni, Ilisimatusarfimmi ilinniartoq Kirsten Frederiksen oqarpoq.
Inuusuttullumi soqutiginninnerulernissaat anguniarlugu tunngaviusumik inatsisissap suliarineranut assigiinngitsunik periutsinik misileraasoqarusuppoq.
- Ilinniartut ilinniarfiinut ornillugit, meeqqat atuarfiinukarluni, sulisitsisut kattuffii ornillugit, taamaalillu periutsit assigiinngitsut misilerarneqarsinnaapput innuttaasunut ataatsimiisitseriaatsit allat, Vivian Motzfeldt oqarpoq.
