Inuusuttut oqallinnermut peqataarusunnerulersimapput

Kalaallit Danmarkimiittut malunnaatilimmik inuiaqatigiinni pissutsinnut soqutigisaqarnerulerlutillu malinnaanerulersimasut Københavnimi Kalaallit Illuutaanni maluginiarneqarpoq.

Kalaallit inuusuttut, ilinniartut allallu Danmarkimi najugaqalersimasut inuiaqatigiinni pisunut annertusiartuinnartumik soqutigisaqaleriartornerat, oqallinnernullu assigiinngitsunut peqataaneruleriartornerat ersarissiartortoq, piorsarsimassutsimik paasissutissiisarnermillu suliaqartoq, Vivi Nielsen oqarpoq.

Taassuma oqaatigaa, Kalaallit Illuutaat Københavnimiittoq assigiinngitsorpassuarnik, soorlu politikerinik Danmarkimeersunik Kalaallillu Nunaanneersunik oqalugiariartorfigineqartartoq, eqqumiitsuliortunik kalaallinit nunamilu allaneersunit saqqummersitsiffigineqartartoq, kalaallinit Danmarkimi ilinniagaqartunit katersuuffigineqartarluni, minnerunngitsumillu Danmarkimi kalaallit peqatigiiffiinniit katerisimaarfittut atorluarneqartartoq.

Aamma oqaatigaa,maluginiaritsik Kalaallit Nunaanni Namminersornerup eqqunneqarnerata kingorna kalaallit politikkikkut suliallit Kalaallit Illuutaannut ammanerulerlutillu ornigitikulanerulerulersut.

- Ukiuni kingullerni assorsuaq malunnarpoq kalaallit politikeriisa eqeersimaarnerulerat ilutigalugu aamma kalaallit naliginnaasumik Danmarkimi najugallit aammalu ilinniagaqartut eqeersimaarneruleriartortut. Uagut ulluinnarni suliaraarput nunatta avammut ammanerulernissaa, taamaattumik Danmarkimi kalaallit akornanni taamatut ineriartorneq uagutsinnut nuannaarutignartorujussuuvoq, Vivi Nielsen oqarpoq.

Taassuma oqaatigaattaaq qallunaat Kalaallit Nunaanni sulisimasut imaluunniit tamatumunnga attuumassuteqartumik suliallit oqallitsitsinernut soqutiginninnerulersimasut.

- Nunatta nunanut allanut naligiittutut inissikkiartornera ilutigalugu kinguaariit nutaat nutaaliaanerusumik eqqarsartaaseqalernikuupput, taamaalillunilu qallunaat Danmarkimi kalaallinut isiginnittaasiat aamma pitsanngoriartorpoq, Vivi Nielsen oqarpoq.