Inuusuttut oqaatsinik naalisaanerulersimapput
![](/sites/default/files/styles/image_934x467/public/article_images/smartphone_630.jpg?itok=j6JZu5LD)
Inuusuttut pingasut avannaani, qeqqani kujataanilu ilinniarnertuunngorniarfinni ilinniartut oqaatsinik naalisaasarnertik imatut nassuiarpaat:
- Sms-erluni nittartakkulluunniit attaveqatigiinnermi allalluni sukkanarnerusarami akikinnerusarlunilu. Oqaatsit naapiartarnagit assersuut"soorl imman" allattarpugut, Sara Lyberth, Nuummi GU-mi ilinniartoq oqartoq.
- Kammalaatigullu sms-eraagatta internittikkulluunniit attaveqaqatigiikkaagatta, amerlanertigut oqaatsit naalisakkat atortarpagut. Pissutigalugu allakkaagatta oqaatigisassagut oqaasissagut anipallakkusuttaratsigit. Oqaatsit naannerusut atoraagatsigit piffissaq sivikinnerusoq atortaratsingu,Qaqortumi GU-mi ilinniartoq Aviaq Larsen, Qaqortumi GU-mi ilinniartoq oqarpoq.
Dia Mølgaard Lennert 19-nik ukioqarpoq Avannaatalu Ilinniarnertuunngorniarfiani ukioq aappassaa ilinniartuuvoq. Isumaa malillugu inuusuttut avannaani qeqqanitut kujataanitullu oqalunnerminni oqaatsinik naalisaaneq imannak atorneq ajorpaat, kisianni mobilikkut internittikkulluunniit allakkaagamik oqaatsinik naalisaasinnaasarput.
- Oqalukkaangatta akuttusuunik naalisaasarpugut, kisianni tuaviorluta allakkaangatta naalisaasarpugut soorlu sms-eraagatta Facebookeraagattaluunniit. Tassa taakkunani naalisaanerusarpugut, Dia Mølgaard Lennert oqarpoq.
Kalaallit oqaasiinik naalisaasarneq nutaajunngitsoq, qangalilu uiguutit ilanngunnagit oqaluttarneq atuuttoq, Carl Christian Olsen Oqaasileriffimmi aqutsisoq oqarpoq.
Inersimasut akornanni oqaatsit ilaat naalisarneqartartut ilagivaat assersuutigalugu "ulloqeqqa", naalisarnagu "ullup qeqqa". Alla assersuut naalisarlugu "atserpaaq", naalisarnagu "atsip paava". Inuusuttullu oqaatsinik naalisaasarnerminni assersuutinik nassaassaaleqinngillat.
- "Ippas tikikkam" tassa taamak naalisaasarpugut, naalisarnagu "ippassaq tikikkama". Taama oqarpoq qeqqani ilinniarnertuunngorniarfimmi ilinniartoq Sara Lyberth.
- Assersuut "ikinng ingerlanng" naalisarnagu "ikinga ingerlagit", taama oqarpoq kujataani ilinniarnertuunngorniarfimmi ilinniartoq Aviaq Larsen.
Avannaani Dia Mølgaard Lennert assersuummik nassaarsinnaanissaminut ajornartorsiuteqarneruvoq, kisianni assersuuteqarpoq:
- Atorneqartorujussuuvoq assersuut "kisian", naalisarnagu "kisianni", taama oqarpoq avannaata ilinniarnertuunngorniarfiani ilinniartoq Dia Mølgaard Lennert.
Qeqqani ilinniarnertuunngorniarfimmi ippasaq kalaallit oqaasiinik immikkut sammisaqarnerminnut atatillugu, ilinniartut Katuami arfineq marluniit taalliaminnik atuaapput.