Inuusuttut nunaqarfinni suliffissaaleqinermik eqqugaanerpaasarput

Nunaqarfinni inuusuttut suliffissaaleqisut tamakkiisumik kisitsisaatigineqanngillat. Nunaqarfiit peqatigiiffianni kanunupe-mi siulittaasoq, Jens Kristian Therkildsen, isumaqarpoq nalunaarsuineq qarasaasiat pioreersut atorlugit ingerlanneqartarsinnaangaluartoq:

- Atortorissaarutilersuisimaneq Nunatsinni annertuvoq. Taamaammat nunaqarfiit amerlanerpaartaasa ajornartorsiutitaqanngitsumik nalunaarsuineq ingerlassinnaangaluarpaat. Taamaammat uggornarpoq ulloq manna tikillugu nunaqarfinni suliffissaaleqisut nuna tamakkerlugu suliffissaaleqisut nalunaarsorneqartarneranni ilaatinneqartanngimmata, Jens Kristian Therkeldsen oqarpoq.

Nunaqarfinni suliffissaaleqinerup qanoq annertutiginera ilissi peqatigiiffissinninngaanniit ilisimavisiuk?

- Nunaqarfinni suliffissaaleqisut amerlasinnaasarput, nunaqarfiit assigiinngitsuunerat tunngavigalugu. Taamaammat isumaqarpugut inuusuttut nunaqarfinni suliffissaaleqisut nalunaarsorneqarsimasunit suli amerlanerusinnaangaluartut. Uggornarporlu taakkua nuna tamakkerlugu kisitsaatigineqanngimmata, Jens Kristian Therkeldsen oqarpoq.

Nunaqarfinni inuusuttut suliffissaaleqinerat akiorniarlugu kikkunukua qanoq iliuuseqartussat?

- Isumaqarpunga inuiaqatigiittut tamatta pisussaaffigigipput. Nalunngilarpummi kommunit aningaasaqarniarnermikkut killilimmik inissisimasut. Nunaqarfimmilu qinikkat sinaakkusiussat kisiisa atorlugit pisinnaatitaaffeqarput. Taamaammat isumaqarpunga nuna tamakkerlugu qanoq iliuuseqarfigineqarpat pitsaanerpaajussasoq, Jens Kristian Therkeldsen oqarpoq.

Naatsorsueqqissaartarfiup kisitsisit saqqummiussai kingulliit naapertorlugit inuusuttut 20-nit 24-nut ukiullit 14 procentii suliffissaaleqipput.

Suliffissaaleqisut siorna 8,3 procentiugaluarput.