Inuusuttut nunanit tamaneersut Ilulissat kangerluani eqqagassanik katersipput
Qaasuitsup Kommuniata, ikiuiniaqatigiiffik Mellemfolkeligt Samvirke suleqatigalugu, Ilulissat Kangerluanni aggustip ulluisa arfineq-pingajuata tungaanut taamatut sulisitsinissaq aaqqissuuppaa.
Inuusuttut eqimattat taakku aasaanerani sulinngiffeqarnertik namminneq kajumissutsiminnik eqqagassanik katersuillutik, inussuliorlutik allanillu suliaqarlutik atorusussinnaammassuk ilaasa immaqa paasiuminaatsilaarsinnaavaat. Ilulissanili allaffeqarfimmiit tamanna nassuiaatissaqartinneqarpoq:
- Kalaallit Nunaanni piorsarsimassuseq pinngortitarsuarlu inuusuttut uku alapernaallugu paasisaqarfigerusuppaat. Taamaammat taamatut sulinerminni tamakku kattutaarsinnaavaat. Kalaallit qanimut suleqatigaat, pinngortitarsuarlu kusanaqisoq najorlugu, Naja Habermann aamma Aron Petersen, Ilulissat Kangerluat pillugu allaffeqarfimmi tamarmik atorfillit, oqarput.
Inuusuttut sulinerat naggaserlugu Ilulissani heliportitoqqap eqqaani qaqqami aqagu nalliuttorsiualaarneqassaaq.
