Inuusuttut peqqissut kikkuuneri aamma ikinngutitaajortornerit kujataanilu misigisassat assigiinngitsut, Narsap eqqaani Iluanik taaguutilimmi, Sukorsip aaqqissugaanik inuusuttunik tammaarsimaartitsinerup ilaatigut nassatarisimavai.
Ukioq allortarlugu, Sukorseq inuusuttunik 14-iniit 21-nut ukiulinnut naapeqatigiissitsisarpoq, ukiorlu manna naapeqatigiinnermi inuusuttut nakkutilliisullu 50-it peqataapput.
16-inik ukiulik, Jeanette Kreutzmann peqataarngaartoq:
- Kammalaatitaarpunga, aatsaat kujaataaniippunga taavalu tasersuarmi aatsaavissuaq naluppunga.
Inuusuttoq peqqissoq qanoq ittuunersoq qularutiginngilaa:
- Inuusuttut peqqissut pujortarneq ajorput, imerneq ajorput, imminut paarisut timersortarlutillu.
Aaqqissuussineq peqataasut iluarisimaarpaat. Aaqqissueqataasoq, Narsap klubbiani pisortaq, Sukorsimilu siulittaasoq, Marie Egede Isbosethsen:
- Naalakkersuinikkut anguniagaasut Inuunerittap aamma innuttaasut peqqissuunissaannik anguniakkat pillugit inuusuttut oqallinnermut peqataanissaat pissusissamisoortutut isigaarput.
Inuusuttut ukiut tamaasa naapeqatigiittalernissamik kissaataat, Sukorsip siulersuisuini tulliani ataatsimiilerunik oqaluuserissavaa.