QULAARPAA Inuusuttut misigissutsit pillugit ammanerulersimapput
![Psykolog Preben Svoldgaard](/sites/default/files/styles/image_934x467/public/article_images/psykolog-preben-svoldgaard.jpg?itok=KuwztTO9)
Ajornartorsiuteqartilluni misigissutsit oqaatiginiarneri ajornakusoortarput. Pingaartumik angutit misigissutsititik pillugit matoqqasarput.
Taamaakkaluartoq angutit inuussuttut misigissutsitik pillugit oqaluttuartarnerat malunnaatilimmik pitsanngoriarsimavoq.
Aamma atuaruk Inuusuttut nukittunerulernissaat suliniutigineqartoq
Taama oqaluttuarpoq, Preben Svoldgaard, Nuummi Dronning Ingridip Napparsimavissuani tarnip pissusiinik ilisimasalik.
- Ammanerulersimasutut ipput. Angutit inuusuttut misigissutsiminnik oqaluttuarsinnaanerupput angutinit taakkunannga utoqqaanerusunut sanilliullugit, tarnip pissusiinik ilisimasalik, imminut toqunnissaminnut siorasaarisunik Dronning Ingridp Napparsimavissuani katsorsaasartoq, Preben Svoldgaard, KNR-imut oqarpoq.
Paqumigineqartut oqaluuserineqartalersimapput
Taanna oqaluttuarpoq angutit 30-t 40-llu missaannik ukioqartut misigissutsiminnik oqaluttuarnissaminnut suli mattoqasorujussuusut inuusuttulli ajornartorsiutitik pillugit oqaluttuarnissaminnut piumassuseqarnerusut.
- Paqumigineqartoq tamanna inuiaqatigiinni ammanerusumik oqaluuserineqartalernerannut pissuteqarpoq, angutillu inuusuttut peroriartornerminni suut kukkussutaasimanersut nalunngilaat, tarnip pissusiinik ilisimasalik Preben Svoldgaard oqarpoq.
Dorte Vangsø Simonsen Maniitsup peqqissaaveqarfiata immikkoortortaqarfiani peqqissaasutut sulivoq. Dorte Vangsø Simonsen ilaqutariinnik katsorsaasuuvoq imminullu toqunnissaminnik siorasaarisunik oqaloqateqatarluni. Taassuma Preben Svoldgaardip saqqummiussai ilisarisinnanerarpai.
- Ukiut qulit kingulliit ingerlanneranni allanngortoqartoq takusinnaavara. Amerlasuut imminnut suliariniarlutik kissaateqartut malugisinnaavara inuttullu pisinnaasatik annertusarusukkaat tamannalu misigalugu nuannerluinnartuuvoq, Dorte Vangsø Simonsen KNR-imut oqarpoq.
Ammanerulersimaneq pingaaruteqarpoq
Preben Svoldgaard oqaluttuarpoq inuusuttut ammanerulersimanerat pingaaruteqartuusoq tassami amerlasuut misigissutsitik allanut oqaluttuarineq ajoramikkit imminut toqunnissaminnut siorasaarisartut.
Imminut toqunnissamik eqqarsaateqartarput eqqarsaatitilli oqaasertalernissaat merserisarpaat oqaasinngortitsinissartillu sungiusimanngilaat.
Taamaattumik inuuneq sumut atussanerlugu nalugaanni, inuttut ajornartorsiornermi aqqusaakkat anigorniarnerat ajornarnerusarput.
Aamma atuaruk Amerlasuut toqunissartik toqqartarpaat
Ilinniaqartuunngikkaanni, ikinngutit avatangiisillu ajorpata, siunissallu qanoq ittuunisaa nalugaanni tamanna ajortumik kinguneqarsinnaasarpoq.
- Imminnullu mattutiivittarput inuuneq taamaattussaanngitsoq paasigangamikku. Allatut inuuneqarusuppunga. Inuunerullu ingerlaqqinnissaanut periarfissat eqqarsaatigineqartarput. Takorluukkat iluatsinngippata unittoortoqartarpoq ingerlariaqqinnissarlu ajornukusoortarluni, Preben Svoldgaard Dronning Ingridip Napparsimavissuani tarnip pissusiinik ilisimasalik oqarpoq.
146-mut sianerit
Nikallungaguit Paarisap nuna tamakkerlugu oqarasuaatikkut siunnersuiffianut Attavimmut sianersinnaavutit, normoraa 146. Imaluunniit meeqqaat oqarasuaataannut 134-imut sianerlutit oqaloqateqarsinnaavutit. Ullut tamaasa nalunaaqutaq 19-21 oqarasuaatit ammasarput sianernerlu akeqanngilaq.
Imminut toquttarneq Qulaarpaami sisamanngorpat sammineqassaaq, nalunaaqutaq 19.30 KNR-TV-kkut kalaallisut aallakaatinneqassaaq, qallunaatullu nalunaaqutaq 20.30