Inuusuttut isummerfii atorneqassapput.

- Nuannerpoq aamma angusaqarnarpoq, nuannisarlutalu aamma ilungersorluta, anguniakkavut anguniarsimagatsigik.

Jane Petersen – Nunatsinni inuusuttut inatsisartuini ilaasortaasoq – taama oqarpoq. Unnuaq Inuusuttut Inatsisartuisa inaarutaasumik aalajangersagartik Inatsisartut siulittaasuannut, Jonathan Motzfeldtimut, Naalakkersuisullu siulittaasuannut, Hans Enoksenimut, tunniuppaat. Inatsisilerinermik ullut sisamat ulapinnikuullutik siunnersuutit 26-it inatsisartunut qinikkanut inuusuttut tunniuppaat.

- Massakkut angusimasarput tassaavoq sinaakkusersuineq, soorlu pinerluttuliornermut tunngasut assigiissuteqartunullu tunngasut angusimavavut, sinaakkusersuilluta aamma isummerluta, taakkulu aamma isummat ingerlateqqissallutigik.

Inuusuttuinnaanngillalli pissarsilluarsimasut. Naalakkersuisut siulittaasuat - Hans Enoksen - aperivarput, inuusuttut suliaat sumut atorsinnaaneraat:

- Inuusuttut inatsisartuisa aalajangersagaat taakku massakkut tigugakkit assut nuannaarpunga, naalakkersuisut sinnerlugit, soorunami taava naalakkersuisunut saqqummiutissavakka, isummersorfissallu pitsaasut, ingerlariaqqinnissamut tunngavissaqqissut, pisussaavavut aamma ingerlateqqissallugit, tassa qularnanngilaq saqqummiussisoqartariaqassaaq, inuusuttut inatsisartuisa piumaasaat taamak qanillattortut aamma soqutiginartorpassuarnik siunnersuuteqarmata, Naalakkersuisut siulittaasuat, Hans Enoksen, oqarpoq.