Inuusuttut innarluutillit Nuummi Katuami isumasioqatigiissapput
Inuusuttut innarluutillit nuna tamakkerlugu Nuummi Katuami apriilip 25-ani 26-anilu isumasioqatigiissapput. Tassani misigisaminnik misilittakkaminnillu oqaasertaliinissaminnut periarfissinneqassapput.
Tamannalu pingaaruteqarpoq.
Inuusuttut innarluutillit namminerisamik inuuneqarlutik inooqataanissamullu pisinnaatitaaffii arlallit pisortanit sumiginnarneqartartut, Inuit innarluutillit illersuisuat isumaqarpoq.
- Tamatta pisinnaatitaaffeqarpugut, innarluutillilli ullutsinni taamak pisinnaatitaaffeqanngillat, soorlu ilinniarsinnaanikkut, sulisinnaanikkut, tamat ornittagaanut ornigussinnaanikkut, inuiaqatigiinnut akulerunnissaminnut, attaveqatigiinermut tunngasuni, timersoriarsinnaanermut, nammineersinnaanermut, sumilu ineqarusunnermut innarluutillit pisinnaatitaaffeqanngillat.
Paarlattuanik siusinaartumik pensionisiaqalernissaannik paaaqqutarisarialinnulluunniit angerlarsimaffimmiilernissaannik taamaallaat neqeroorfigineqartartut, Innarluutillit illersuisuat Anja Hynne Nielsen taama oqarpoq.
- Tamannalu akisussaassuseqannginnermik takutitsineruvoq. Inuusuttullu innarluutillit siusinaartumik sulisinnaajunnaarsinneqartarnerat, utoqqaat illuannulluunniit inissinneqartarnerat akuersaarneqarsinnaanngilaq, tamannalu inuit pisinnaatitaaffiinik unioqqutitsineruvoq.
Natascha isumasioqatigiittoqarnissaanut qilanaarpoq
Inuusuttup innarluutillip 20-nik ukiullip Arsummeersup, maannali Nuummi najugaqartup, Natascha Ingemann Jakobsen-p isumasioqatigiinnissami naapitaqarnissani misigisaminillu avitseqateqarnissani qilaaraa.
- Torragersuaarpara taamatut aaqqissuussisoqarnera pissutigalugu ataatsimoorsinnaatitaagatta uagut innarluutillit, isummagullu annillugit, Natascha Ingemann Jakobsen taama oqarpoq.
Taassumalu eqqaavaa nunatsinni innarluuteqartuulluni pikkunarsinnaasartoq.
- Artornalaarsinnaasarpoq misiginarsinnaasarami soorlu inuit ilai tunuartertartut, uanga misigisarpunga ersigineqarlunga taamaasigaangata, Natascha oqarpoq nangillunilu:
- Kisianni amerlanertigut tapersersorneqartutut misigisarpunga assut, Natascha taama oqarpoq.
Nunatsinnilu innarluuteqarluni unammilligassat ikittuinnaanngillat. Natascha Ingemann Jakobsen assersuutigalugu inuusuttunngulerluni nikallungarujussuarsimavoq:
- 13-nik ukioqarlunga svær depressionimut nakkaakkama tassani nakorsat assut pissarsiariuminaattorujussuugamik aatsaat ajortumik pisoqarmat qisuariaramik, taava misigisimavunga arlaannik ajortoqartinnagu qisuariarneq ajortut, Natascha Ingemann Jakobsen taama oqarpoq
Iliuuseqajaarnissaq pingaaruteqarpoq
Inuusuttut innarluutillit inuiaqatigiinni peqataassinnaaqqullugit iliuuseqajaartarnissaq taassuma ujartorpaa:
- Kalaallit Nunaata siusinaartumik iliuuseqartarneq aaqqiiffigisariaqarpaa, tapersersuineq, ilinniartitaaneq, Anja Hynne Nielsen taama oqarpoq.
Taamaammat inuusuttut innarluutillit isumasioqatigiinnerminni pisinnaatitaaffeqarnertik pillugu erseqqissuliorsinaanermik aamma pikkorissassapput.
- Allannermut nukittorsassapput, takorloorsinnaassusertik atussavaat, taavalu taalliorsinnaanermut politikkimillu oqalunnissamut sapiisssuseqassallutik. Imminnut attaveqatigiilissapput, taavalu pisinnaatitaaffinnik namminermullu tunngasunik aalajangiisinnaatitaanermik ilisimasaqalissallutik, Anja Hynne Nielsen taama oqarpoq.
Nataschallu Isumasioqatigiinnissami misigisamilu oqaasertalernissaannut sammisassat ilaat qilanaaraa:
- Immaqa taalliornissaq, misigissutsit annissinnaanissai, Natascha taama oqarpoq
