Inuusuttut Inatsisartui februaarimi ataatsimiissapput
Inuusuttut Inatsisartui ulluni makkunani ataatsimiittussaagaluit ullut ataatsimiiffissaat nutaat saqqummiunneqarput. Ataatsimiinnissaq pissaaq februaarip ulluisa 14-ianniit 19-iannut. Kisianni aatsaat piviusunngorsinnaavoq peqataaniarluni allanik nalunaartoqassappat.
Allattoq Louise M. Kleemann
Peqataasussat affaannaat nalunaarsimammata ataatsimiinnissaagaluaq kinguartinneqarpoq, taamaattumik ilinniartut kaammattorneqarput aaqqissuussinermut soqutiginnittut peqataanissamut nalunaaqqullugit.
Ilinniarfiit 15-it inuusuttunut attaveqarfittut atuuttut, aammalu Inuusuttut
Inatsisartut Allattoqarfiata nittartagaa www.inatsisartut.gl paasissutissanik aamma aallerfigineqarsinnaavoq. Kingusinnerpaamik aqagu januaarip ulluisa 20-anni nalunaartoqarsinnaavoq.