Asseq Ilimmarfimmi ilinniartut naammassineraneerpoq.Assi: KNR

Inuusuttut ilinniakkaminnik naammassinnittartut amerlanerulerput

Kalaallit inuusuttut Københavnimut qanittuni qaffasinnerusumik ilinniarfinni naammassisartut Nunatsinnullu uterlutik suliffittaartartut amerliartorput.

 

Københavnimi Løvstrædemi Kalaallit Illuani ilinniartunut siunnersorti, Pia Rosing Heilmann tulluusimaarluni oqaluttuarpoq, 2014-mi naammassisut 57-it amerlanerpaartaat, Nunatsinnut uterlutik suliffittaareersut.

 

- Tassa pissagarnarluinnartunik ilinniagaqartut soorlu ingeniørinngorniat, tarnip pissusaanik ilisimasallit, suliffissuaqarnermi aningaasarsiornermut ilisimasallit, peqqissaasut aamma sutigut tamatigut atornerluilersimasunut katsorsaasut allarpassuarnillu ilinniakkanik naamassisut Kalaallit Nunannut uterput tassanilu suliffittaarlutik.

 

Københavnimi Løvstrædemi Kalaallit Illuani ilinniartunut siunnersorti, Pia Rosing Heilmann taama oqarpoq.

 

Naamassisunit 57-iusunit taamaallaat 14-nit Nunatsinnut maanna uternissartik suli kissaatiginngilaat, tamannalu arlalinnik pissuteqartoq, Pia Rosing Heilmann oqarpoq.

 

- Taakku maaniiginnarnissaminnik aalajangernerat assigiinngitsunik peqquteqarpoq. Ilaat suli qaffasinnerusumik ilinniagaqalernissartik pillugu ingerlaqqipput, ilaat aapparmi ilinniakkamik suli naammassinninnginnera pillugu utaqqilaaqqaarniarput imaluunniit naammassereernerminni Danmarkimi ilaallu Tuluit Nunanni suliffittaarsimallutik tamanna ilikkagaqarluarnissaminnut atorlugu suli uterusunngikkallarput, pissarsiaqarluareerunilli Nunatsinnut uternissartik naatsorsuutigalugu taakku oqarput, Pia Rosing Heilmann oqarpoq.

 

Kalaallit Nunatsinni nunanilu allani qaffasinnerusumik ilinniagaqartut ukiuni qulini kingullerni amerliartorput. Ilinniakkat sivisunerusumik ingerlanneqartartut qaffasissumillu ilinniakkat nuannarineqarnerullutik, Nunatsinni Naatsorsueqqissaartarfiup 2014-imi kisitsisaataanni tamanna takuneqarsinnaavoq.

 

Tassa 2014-imi qaffasinnerusumik ilinniagaqartut 1.294-iupput taakkunannga 800-it missaanniittut Nunatsinni ilinniagaqartuullutik 500-llu missaanniittut Danmarkimi nunaniluunniit allani ilinniagaqartuullutik.

 

Danmarkimi kalaallit ilinniagaqartut amerliartortut naammassisartut pillugit, Danmarkimi Kalaallit Illuutaanni allani ilinniartunut siunnersortik nuannersunik aamma allagaqarput. Soorlu Odensemi Kalaallit Illuat nittartakkaminni allaaseraat, ilinniagaqareerlutik siorna 2014-imi naammassisut 18-iusut taakku inatsisilerituuniit inunnik isumaginninnermut suliaqartussatut ilinniagaqartuullutik

 

Ukioq manna qassit qaffasinnerusumik ilinniagaqarnissamut qinnuteqartut qassiuneri aatsaat julip qaammataa naammassippat tamanut tusarliunneqarsinnaassasoq naatsorsuutigineqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl