Inuusuttut ikorfartorneqarnerulernissaat oqallisigaat
Isumasioqatigiinneq Isumaginninnermut Naalakkersuisoqarfimmit aaqqissuunneqartoq, Isumaginninnermut Naalakkersuisumit Maliina Abelsenimit ullaaq ammarneqarpoq.
- Inuiaqatigiinnitsinnut pingaartuuvoq innuttaasunik piginnaasaqarluartunik pilersitsisoqarnissaa. Meerartagut inuusuttortagullu taamaattumik pitsaanerpaamik periarfissaqartariaqarput alliartornerminnillu atugaqartariaqarlutik. Suliniuteqareernermi malinnaaneq suliniutip taassuma ilagaa pisariaqartoq inooqataanikkullu kingornussap pitsaanngitsup kipitinnissaanut alloriarneq pingaaruteqarluni, Maliina Abelsen oqarpoq.
Qanorluunniit inuusuttoq angajoqqaarsiaminit imaluunniit ulloq unnuarlu angerlarsimaffimmiit nooreersimatigigaluaruni tapersersorneqartuartariaqarpoq. Misissuinerimmi takutereerpaat inuusuttorpassuit angerlarsimaffimmik avataanut inissinneqarsimasut atuarnerminnut, ilinniagaqarnerminnut, suliffimmik misiliinerminnut suliffeqarnermullu tapersersorneqarnissaminnut pisariaqartitsisartut. Tamatuma saniatigut inuttut inooqatigiinnikkullu attavissaqalernissamut tapersersorneqarnissamut ilaatigullu aningaasaqarneq il.il. pillugit siunnersorneqarnissamut inuusuttut pisariaqartitsisinnaasarput
Isumasioqatigiinnerup siunertaraa suliniuteqareernermi ajunngitsumik malinnaanissaq pillugu ilisimasanik paarlaasseqatigiinnissaq. Tassa nammineersinnnaasunngorlutik imminnullu isumagisussanngorlutik inuusuttup inissinneqarsimasup eqqortumik tapersersorneqarnissaa qanoq qularnaarneqassava. Inuusuttut inissinneqarsimasut inersimasunngornerat qularnaarniarlugu periarfissanik nutaanik nassaarniarnissamut suliatigut ilinniarsimasut isumassarsinissaannut isumasioqatigiinnermi periarfissinniarneqarput.
Meeqqanik inuusuttunillu ulluinnarni suliaqarlutik ingerlataqartut arlalissuit isumasioqatigiinnermi peqataapput. Nunatsinni meeqqat angerlarsimaffianiit, Piareersarfimmiit saqqummiussisoqassaaq aamma siusinnerusukkut inissinneqarsimasoq inuusuttoq suliniuteqareernermi malinnaanermit nammineq misilittakkani eqqartussallugit. Taakku saniatigut Norgemi aamma Danmarkimi misilittakkat pillugit saqqummiussisoqassaaq.
