Inuusuttut Danmarkimut nuuttaleraluttuinnarput

Kalaallit suliffissaqaratik inissaqaratillu nuuttartut amerleriarnerat Kofoed Skolenit Danmarkimiittunit maluginiarneqarpoq. Oqaatigineqarpoq kalaallit inissaqaratillu suliffissaqanngitsut

isiginiarneqarnerulernerannik tamanna pissuteqaratarsinnaasoq.

Kofoed Skolep Kalaallinut immikkoortortaanni pisortasup Kurt Olsenip suliffissaqaratillu inissaqanngitsut qasserpiaanersut ilisimanngilai, ukiorli kingulleq Ålborgimi inuit 57-it nunatsinnit noorlaat atugarliortutut saaffiginnissimapput. 57-t akornanni aqqaneq marluk inuusuttuupput 18-it 25-illu akornanni ukioqartuullutik.

- Aatsaat taama amerlatigisunik inuusuttunik nuuttunik takusalerpugut, tamanna eqqarsarnartoqarpoq, inuusuttut inissaqaratik suliffissaqaratik qallunaatullu oqalunnissaminnut ajornartorsiutillit takkuttalerput, Kurt Olsen radioaviisimut oqarpoq.

Kurt Olsenip aamma erseqqissarpaa Danmarkimi pitsaanerusumik atugaqarnissamik eqqarsarluni nuunnerigaluaq, inissaaleqinermik suliffissaqannginnermillu taarserneqarajuttartoq. Danskisut oqalussinnaannginneq inuiaqatigiinnut akuulernissamut akimmisaarutaagajuttarpoq. – Suliffeqarfiit tamarmik danskisut oqalussinnaanissaq piumasaqaatigisarpaat, Kurt Olsen oqarpoq.

Kofoed Skolet pingasunik immikkoortortaqarput. Københavnimi Ålborgimi Esbergimilu.