Inuusuttut aalakoortut politiinut ajorniartaqaat

Politiinut ataqqinninneq siornatigutut ikkunnaarpoq. Politiinngorniaq ullaaq Radioavisimut oqaluttuarpoq, inuit politiinut isiginnittaasiat allanngoriartortoq malugisinnaallugu.

Taamatut isiginninneq politimesterip tulliata; Bjørn Bayip, ilisarisinnaanerarpaa. Inuusuttut aalakoortut illoqarfimmi perulluliortut ajornartorsiutaanerat taassuma ilisimaarilluarpaa.

Politiit unnuakkut nakkutilliillutik angalaartut ajornartorsiutinik ingammik aalakoortunik naammattuugaqartarput.

Qaammatit marlussuit matuma siornagut politiit ilaat tigusaqarniarnerminut atatillugu qanittuminngaanniit niaqqumigut puiaasamik milorneqarpoq.

Pisimasoq ataasiaannarluni pisimasutut isigineqarsinnaavoq, taamatulli pissuseqaleriartoqqajaanertut isigineqarsinnaalluni.

Ukiut qulit kingulliit ingerlaneranni politiinut ataqqinninneq, ingammik unnuakkut inuusuttut akornanni, minnerulersimasoq maluginiarneqarsinnaavoq.

- Tamakkua tassaasarput inuit aalakoortut qanorluunniit oqarfigineqaraluaraangamik soqutigisaqarneq ajortut.

Isumaqarpunga ilaatigut tamanna inuiaqatigiit ineriartornerannut tunngassuteqartoq. Soorlu politiinnaanngitsunut tamanna atuuppoq, inunnulli oqaasissaqartunut allanut aamma atuussoraara, soorlu ilinniartitsisunut peqqissaasunut assigisaannullu ataqqinnissuseqannginneq nalinginnaaleriartorpoq.

- Tamanna politiitut iliuuseqarfigiuminaappoq, taamaattorli, unnuakkut pisoqarfiata nalaanniittarpugut, soorlu erseqqissarniarlugu politiit oqaasii naalanneqartussaammata, Bjørn Bay oqarpoq.

Angut inuusuttoq politiimik puiaasamik milorsisoq qaammatini arfinilinni pinerluuteqarsimasunut inissiisarfimmiittussanngorlugu eqqartuunneqarpoq.