KNR Inuusuttunut aallakaatineqartartoq ”Tusartaat” ineriartorteqqinneqarpoq
Aallakaatitassiortut amerlanertigut pingasunngornikkut tallimanngornikkullu aallakaatitsisassapput. ”Tusartaat”-ip aallakaatitsinerini oqaluuserisat saqqummiussallu aalajangersimasunik aallaaveqarsinnaapput. ”Tusartaat”-ip aalajangersimasumik imarissaavai quianarsinnaasut imaluunniit nuannaarutaasinnaasut. Aallakaatitsisartussat imminnut imatut ilisaritipput:”Uanga (Carsten Christensen) illarnarsinnaasunik ingerlatsisarpunga ilumoorsaarpallaartuunnangalu - uangali (Hans-Peter) ilumoorsaarsinnaasarpunga aammali qungujulaarsinnaasarlunga. ”Aallakaatitassiortartut neriuutigaat aallakaatitseriaatsip nutarterneqarnera isiginnaartartunit ilassilluarneqassasoq.
Aallakaatitsinermi ini isersimaffiusartoq aamma aallakaatitassiortartunit taakkuninnga nutarterneqarpoq, 80-korpalaartinniarlugulu suliarineqarsimalluni. Nipilersorlunili sarsuasuliat nutaaliaalluinnassapput. Ilaatigulli aallakaatitassiortut kingumut qiviartarniarput, 80-kunneersunillu nuannarineqartuaannartuusunik tusagassaqartitsisassallutik.
Isiginaartartut suli assinik, inuulluaqqussutinik kiisalu tusarnaagassatut kissaatigisanik uunga ingerlatitsisinnaapput facebook.com/Tusartaat
”Tusartaat” nutartigaq siullermik isiginnaarneqarsinnaavoq /tusarnaarneqarsinnaavoq pingasunngorneq 18. marts nalunaaqutaq16.
”Tusartaat” ullut tamaasa aallakaatinneqartassaaq piffissami nal.16.-17. unnukkullu aallakaateqqinneqartassaaq.
Paasissutissanik annertunerusunik pissarsiniaruit attaveqarfigiuk KNR-imi pilersaarusiornermi pisortaq Niels Pavia Lynge npl@knr.gl imaluunniit TV-mi pisortaq Jan Berg jbe@knr.gl
