Inuusuttuaqqat pinerluuteqarsimasut inissiisarfittaartariaqarsorai
Pineqaatissinneqarsimasunut Nuummi inissiisarfimmiitinneqarput, inuusuttaqqat marluk tamarmik 18-nit inorlugit ukiullit.
Inuusuttuaqqanut pinerluuteqarsimasunut immikkut inissiisarfimmik peqalernissaa, Meeqqat Illersuisuata, Aaja Chemnitz Larsenip maanna sorsuutiginialerpaa.
- Inuusuttuaqqanik pineqaatissiisarneq siunertarinagu, taakku inuiaqatigiinnut akuleruteqqinneqartarnissaat siunertaasariaqarpoq, Aaja Chemnitz Larsen oqarpoq.
- Inuussuttuaqqat pinerluuteqartarnissaat pinaveersaartinniarutsigu, taava tamatuma siusissukkut pinaveersaartittarnissaa sulissutigineqartariaqarpoq, tassami pinerluuteqartarnerit tamarmik arlaannik peqquteqartarput, Aaja Chemnitz Larsen oqarpoq.
Inuusuttuaqqat 18-nit inorlugit ukiullit pinerluuteqarsimasullu, kommuninit Namminersorlutillu Oqartussanit akisussaaffigineqarnerati naqissusissallugu avaqqunneqarsinnaanngitsoq, Aaja Chemnitz Larsenip oqaatigaa.
Taassuma pineqaatissinneqarsimasunut inissiisarfik ataasinngormat pulaarpaa, takuniarlugu inuusuttuaqqat tassaniisinneqartut qanoq atugaqartitaanersut paasiniarlugu. Aaja Chemnitz Larsenip oqaatigaa, inuusuttuaqqat takusinnaasani naapertorlugu ajunngitsumik atugaqartinneqartut.
Pulaarnermi kingorna Aaja Chemnitz Larsen oqarpoq, inuusuttuaqqanut pinerluuteqarsimasunut Nunatsinni immikkut inissiisarfeqartariaqaraluartoq, taamaattumillu pilersitsisoqarnissaa, Meeqqat Illersuisuata pissusissamisuuginnarnerarlugu.
- Inissiisarfimmik taamaattumik peqartuuppat, taava inuusuttuaqqat sooq pinerluuteqartarneri sukumiinerusumik paasineqarlunilu pinerluuteqartarnissaat pinaveersaartinneqarsinnaassagaluarpoq, Aaja Chemnitz Larsen oqarpoq.
Sapaatip akunnerani kingullermi, radioaviisimi eqqartorparput, niviarsiaraq 15-inik ukiulik, Nuummi pineqatissinneqarsimasunut inissiisarfimmiisinneqartoq. Maannali taanna ulloq unnuarlu angerlarsimaffimmut tallimanngormalli inissinneqarsimasoq, Meeqqat Illersuisuata, Aaja Chemnitz Larsenip oqaatigaa.
Inuusuttuaqalli marluk 18-init inorlugit ukiullit, suli pinerluuteqarsimasunut inissiisarfimmiisinneqarput, inersimasut pineqaatissinneqarsimasut akornanniillutik.
