Inuusuttuaqqat piareersimanatik efterskoleriartarput
- Inuusuttuaqqat danskit efterskoliini aatsaat aallartilaaginnarlutik angerlaannartarnerat taakkununnga nallinnartuuvoq, Meeqqat efterskoleriarnissaat pillugu Kalaallit Nunaanni misissueriaasiusartoq naammaginanngilaq, ilaatigut aviisimut Sermitsiamut taama oqarpoq Klank Efterskolep pisortaa Ulrik Andersen.
Inuusuttuaraq niviarsiaraq efterskolerniarluni tikikkami ullut marluinnaat qaangiummata Kalaallit Nunaannut angerlaqqippoq, pinngitsaalineqapajaartumik efterskoleriarnissaa piumasarineqarsimammat.
- Inuusuttuaqqap taassuma efterskolernissani nammineerluni kissaatiginngilaa, allalu nukappiaraq isumaqarsimagaluarpoq højskolertussanngorluni. Siorna nivissat marluk qaammatialunnguit efterskoleramik Kalaallit Nunaannut angerlaqqipput, allallu nukappiaqqap efterskolemiinnissani napparsimanarilertuaannarpaa, Ulrik Andersen oqaluttuarpoq. Taassuma erseqqissaatigaa danskit oqaasiinik atuilluarsinnaannginneq danskit efterskoleniit angerlarartarnermut peqqutaagajuttartoq.
