Inuusuttuaqqat eqqissiviilliortitsisarunnaartut

Nuummi inuusuttuaqqat pinerlunniartartut arfineq-marluk sapaatit akunnerini tallimani Qoornumiitsinneqarnerat, Nuummi pinerlunniartoqartarnerit ikileriarnerannik kinguneqaannanngilaq.

Inuusuttuaqqat pinerlunniartartut ilaannut illoqarfissuup avataaniiginnarusulernerannik kinguneqartitsisimavoq.

Inuusuttuaqqat Qoornumiitsinneqaqqaarput, kingornalu kujataani savaatilinni sulisinneqarsimallutik, tamannalu nuannarilluarsimagaat, Nuup Kommuneata meeqqanut ilaqutariinnullu ataatsimiititaliap immikkoortortaani pisortap, Dora Kleistip oqaatigaa:

- Inuusuttut Qoornumiinnerat inuusuttunut nalilersipparput, Nuup Kommuneatalu periarfissiinera qujarussimaqaat, takusinnaagamikku pinerlunniartarnerit imminerminut peqqinnanngitsuusoq, Dora Kleist oqarpoq.

Taassuma oqaatigaattaaq Nuup illoqarfittaani eqqissiviilliortitsinerit unikaallassimasut:

- Assigiinngitsunik eqqissiviilliortitsinerit pinerlunniartarnerillu unikaallassimasut maluginiarsimavarput, Dora Kleist oqarpoq.

Inuusuttuaqqat 15-it 18-illu akornanni ukioqarput, kommunillu inunnik isumaginnittoqarfiata sullissinera politiillu ikiuinerat angajoqqaanit iluarineqarsimaqaaq.

Inuusuttuaqqat savaatilinniissimasut Nuummi angajoqqaaminnut utereersimalerput, ilaallu ulloq unnuarlu paaqqinnittarfinnut namminersortunut inissinneqarsimallutik.