Inuusuttuaqqat atoqatigiinneq pillugu ilinniartinneqartariaqarput

Nunatsinni inuusuttut naartuersittartut suli amerlavallaarsorinarput, inuusuttuaqqallu akornanni atoqatigiittarneq pillugu ilinniartitsisinnaasunik pikkorissaasarneq Aasianni misilittagaqarfigineqarpoq. Taakku taaguuteqarput sexualistit, inuusuttoqatiminnullu ilinniartitsisarput.

Sexualistitut misilittagalllip Aasianneersup Ivalo Thorinip misilittakkani ima oqaluttuarai:

- Pikkunaannerusarpoq inersimasuninngaanniit atoqatigiittarneq pillugu ilinniartinneqarluni, taamaammat inuusuttuaraqataalluni taamatut ilinniartitsisarneq soqutigineqarnerusartoq malugisimavara, Ivalo Thorin oqaluttuarpoq nangillunilu: - inuusuttuaraqatit misilittagaat tusarnaarlugit soqutiginarnerusarput. Aamma atuartitsigaangatta maluginiartarpara, kingorna inuusuttuaqqat naartunaveersaatinik atuilersartut.

Ullumikkut nunatsinni naartuersittartut suli amerlapput, sexualistiusimasorlu siunnersuutissaqarpoq:

- Ullumikkut tamatta mobiileqarpugut, taannalu atorlugu iisartakkamik iisinissamut eqqaasitsissutitut atorneqarluarsinnaavoq, aamma angajoqqaat tapersersuinerusinnaapput. Aamma angajoqqaat eqqumanerusinnaapput.

Taama oqarpoq Aasianni meeqqat atuarfiani 11 klassimiit utoqqaavallaalernini tikillugu sexualistitut atorfeqarsimasoq, Ivalo Thorin.