Inuusuttoq: Piareerutta namminersulivikkumaarpugut

Inuusuttut Inatsisartui ataatsimiillutik ullumi aallartittut, naalakkersuinermut tunngasunik oqaaseqaraangamik imminnut killilersorneq ajorput.

19-inik ukiulik Mutsi Bourup Egede assersuutigalugu oqarpoq, meeqqanik ikkatiginnittartunut oqarasuaatikkut saaffiginnittarfeqalertariaqartoq, inatsisinik minnerusumik unioqqutitsisut inuiaqatigiinni sulisinneqartalertariaqartut kinguaassiutitigullu atornerluisut sakkortunerusumik pineqaatissinneqartariaqartut. Taamaattumik isumaqarpoq namminersulivinnginnermi ajornartorsiutit qaangernissaat pingaarnerpaasoq.

Mutsi Bourup Egede namminersornissaq pillugu ima oqarpoq:

- Isumaqarpunga namminersulivissasugut, kisianni namminersulivissagutta aamma nunap iluani pissutsit tamarmik aaqqinneqassasut namminersulivinnginnitsinni. Massakkut soorlu takusinnaavagut sukkasoorujussuarmik namminersulivikkusorrattut, ajornartorsiutit soorlu qimanneqarniaannartut. Politikeritoqqat immaqa namminneq angorusutatik angorusungaaramikkit massakkut namminersulivinnissaq kisiat angorusukkaat, makku ajornartorsiutit aatsaat saqqummileruttortut, Mutsi Bourup Egede oqarpoq nangillunilu.

- Paquminartutut isigineqarnikut qimanniaannarneqartutut soorlu isikkoqartut massakkut. Taakku qaangeqqaarlugit aatsaat namminersulivinnissaq immaqa iluamik eqqartorneqarnissaa pingaarnerugaluarpoq.

Aperigatsinni qaqugu namminersulivittoqarsinnaanersoq ima akivoq:

- Ullormik taasinissara nuannarinngilara, pissutigalugu ullormik taasigutta taava tassunga anguniakkanut tuaviortumik immaqa aaqqissuussaasoqalissagami. Tuaviorussivallaarutta kukkunerparujussuit naggataatigut takusinnaanngussagatsigit. Piareerutta namminersulivikkumaarpugut. Ullormik aalajangersimasumik taasinissaq killeqartippara. Inuusuttut inatsisartuini peqataasoq 19-inik ukiulik Mutsi Bourup Egede Narsameersoq taama isumaqarpoq.

Inuusuttut inatsisartui pillugit Itisiliinermi annerusumik tusagaqarsinnaavutit, knr.gl\itisiliineq alakkarukku.