Inuusuttoq filmiliortartoq COP10-mut peqataassaaq
Naalagaaffinni Peqatigiinni uumasoqassuseq pillugu ataatsimeersuarnerannut peqatigitillugu inuusuttunut ataatsimeersuarneq, GO4BioDiversity.-imik taaguuserneqarsimasoq, pissaaq. Tassani Qivioq Kern Kreutzmann Kalaallit Nunaat sinnerlugu peqataasussatut toqqarneqarput.
Taamaattumillu taassuma kalaallinik utoqqarnik assiliisarlunilu apersuinini aallartissallugu. Taakkua inerneri kingusinnerpaamik septembarip 20-anni naammassereersimasussat Japanimi oktobarimi takutinneqassapput.
Tamanna Qivioq Kern Kreutzmannip Kalaallit Nunaata avammut nittarsaanneranut periarfissatsialaasoraa:
- Nunani allamiorpassuit naapippakka, taakkualu Kalaallit Nunaanni inunnik najugaqartoqarmat tupigusuutigaat. Ajoraluartumik amerlanngilagut angalaarsinnaasut oqaluttuullugillu taamaattoqarmat. Kisiannili nunani tamalaani tusagassiorfitsigut nunarput kulturerpullu takutissinnaavarput, oqarpoq.
Naalagaaffiit Peqatigiit uumasoqassuseq pillugu ataatsimeersuarnissaat piviusunngorpoq Rio de Janeiromi 1992-imi imminut napatissinnaasumik ineriartornissaq pillugu nunarsuaq tamakkerlugu qullersat ataatsimiinneranni.
Suliniuteqarnerup ilaa tassaavoq nunarsuarmi tamarmi suliniaqatigiiffiit oqartussaaffeqarfiillu 600-t sinneqartut namminneq piumassutsiminnik ilanngunnissaat, taamaalillutik taakkua 2010-mi anguniagaq pingaartillugu malunnartinniassammassuk.
