Inuusuttoq assilissanik Taseralimmi saqqummersitserngaartoq
Inuuteq Storch sisimiormiuuvoq, assiliivimmillu qungatsimigut nivingatitaqartuaannarluni. Sisimiuni inuusuttuunera assilisaatigut uumassuseqarluartutigut aalassarissuseqarluartutigullu takuneqarsinnaavoq.
Inuuteq assiliisutut ilinniarsimasuunngilaq, imminulli ilinniartissimalluni. Maannalu tassa Taseralimmi siullerpaamik saqqummersitsissaaq.
- Inuutip ilutsinut qalipaatinullu alapernaannera alutornarluinnarpoq, nutaannguallannartuullunilu. Inuusuttup taama piginnaasaqartigisup saqqummersitseqqaarnera Taseralimmi pisussaammat nuannaarutigeqaarput tanngassimaarutigalugulu. Kulturip Illorsuata nittartagaani taama allaaserinnittoqarpoq.
Saqqummersitsineq unnugu ammarneqarpat oqalugiartoqassaaq, aliikkusersuisoqarluni unnuarulu ataatsip tungaanut discomik qitittoqassalluni, tassanilu inuusuttut inuusuttorpalaartullu tamarmik tikilluaqquneqartut, kulturip illorsuata pisortaa, Juaaka Lyberth allappoq.
