Inuussutissat asiusut politiinut nalunaarutiginnissutaapput

Namminersorlutik Oqartussani Nersutit Nakorsaannut immikkoortortaqarfik aamma Atuisartut Allattoqarfiat, Nuummi neriniartarfinnut, nerisassanik piariikkanik angerlaassassanik nioqqutilinnut aamma niuertarfinnut aqqanilinnut inuussutissanik tuniniaasartunut pulaaqattaareersut, nalunaaruteqartoqarpoq. Sermitsiami ullumi saqqummersumi taama allaaserinnittoqarpoq.

- Inuussutissat ullormik tunineqarfissaminnik kingullermik qaangiisimasut pulaarnermi, pisortani oqartussat nakkutilliisuisa eqqarpaat. Matumani ullormik tunineqarfissaannik kingullermik nalunaarsorneqarsimanngitsut imaluunniit nalunaaqutsiisarnermi maleruagassanik malinnissimanngitsut ilanngunneqarlutik, uumasut nakorsaasa pisortaat Mads Thor Madsen Namminersorlutik Oqartussat Nersutit nakorsaannut immikkoortortaqarfianeersoq, aviisimut taama oqarpoq.

- Nioqqutissat niuertarfinni ilioraasarfinniittut, nillataartitsivinniittut qerititsivinniittullu misissorneqarput. Pulaarnermi ataatsimi nioqqutissat inuussutissat 500 kiilut igippavut. Containeri eqqaavigineqartoq ulikkaarluinnarlugu, nersutit nakorsaat oqarpoq.

Suliffeqarfiit pingasut politiinut nalunaarutigineqartut sorliuneri taassuma ilisimatitsissutigisinnaanngilai.

Piffissami kingullermi qaammatip aappaata affaani misissuiartorluni pulaartoqartarpoq. Aamma Atuisut Allattoqarfiata aamma Nersutit Nakorsaqarfiata ataqatigiissaakkamik suleqatigiinnerat aatsaat misilinneqarpoq.

- Sinerissami pisisartut ataatsimiititaasa tamatumunnga assingusumik suliaqarnissamut piumassuseqalernissaat neriuutigaarput, Mads Thor Madsen Sermitsiamut taama oqarpoq.