Inuussutissat akii umiarsuillu angallavii oqallisaapput
- Nerisassat ulluinnarsiutit akiisa qaffakkiartuinnarnissaat ilimagineqarpoq aammalu amikkittoorsinnaaneq sunniuteqarsinnaasoq misissukkami FN-imut saqqummiussatsinni takuneqarsinnaavoq, nunatsinnit ataatsimiinnermi peqataasoq Aqqaluk Lynge oqarpoq.
Silap pissusaata allanngoriartornerata kingunerisaanik imaatigut angallannerulernissaq eqqartorneqartalereerpoq. Nordvestpassage aaqusaarlugu angalaneq ukiut tulliuttut periarfissanngortussaavoq. Amerikap nunavittaa avannaqqullugu immakkut aqqut – Sullualuk orninneqassaguni nunatta imartaa aqqusaartariaqarpoq.
- Davidstræde sineriapput aqqusaarlugu umiarsuarnik assartuutinit angallavigineqartussaavoq, tassanilu malittarisassaqartitsineq aamma ajunaarsinnaanermut upalungaarsimatitsineq pisariaqartorujussuuvoq, Aqqaluk Lynge oqarpoq.
- Pisussat uagut innuttaasut saneqqutiinnarluta periataarsinnaammata, taamaammat Ilulissani maajip naalernerani danskit Nunanut allanut ministeriat ataatsimiititsinerani paasinarsiumaarpoq qanoq kalaallit danskillu isumaqatigiissinnaanersut.
Aqqaluk Lynge Nunap Inoqqaavi pillugit ataavartumik ataatsimiititaliami Permanent Forumimi ukiuni pingasuni ilaasortaareerluni saamimit Sverigemeersumit Lars Anders Baer-imit taarserneqaqqammerpoq.
Nunap Inoqqaavi Pillugit ataavartumik ataatsimiititaliaani ilaasortat sapaatip-akunnerata tulliata tungaanut ataatsimiissapput.
