Paamiuni Royal Greenlandip suliffissuani raajanik tunisassiornerup appariartinneqarnerata kingorna sulisut 90-it angerlartinneqartariaqarnerat, suleqatigiinnissamut isumaqatigiinnermik tunngaviliisuuvoq.
Royal Greenlandip Paamiuni tunisassiorfiani sulisut angerlartinneqartariaqarnerisa kingorna Kommuneqarfik Sermersooq iliuuseqapallappoq, sulisullu 47-t sulilersillugit, sulisullu sinnerisa amerlanersaat aaqqiivigineqarlutik.
Royal Greenlandip saattuanik Paamiuni tunisassiulernini annertusarusuppaa. Annertunerusumillu tunisassiorsinnaalernissamut avataasiorlutik saattuarniat pisassiissutinik qinnuteqarsimasut naalakkersuisunit akuersaarneqarnissaat pisariaqarpoq. Pisassiissutit pissarsiarineqassappata Royal Greenlandip Paamiuni tunisassiulernissaani inuit 40-t missaanniittut sulisorineqalersinnaapput.
Illua’tungeriit siunissaq ungasinnerusoq eqqarsaatigalugu kissaatigaat inuussutissarsiutitigut siuarsaanissaq pillugu attaveqatigiittartussanik siunnersuisoqatigiinnik pilersitsisoqassasoq.
- Suliffeqarfiit nutarsaaqataarusuttut suleqatiseraavut, taamaalilluni tunisassianik piorsaanissami isummersueqataasinnaaniassammata, Inuussutissarsiornermut ataatsimiititaliami siulittaasoq, Ove Karl Berthelsen, oqarpoq.