Inuussutissarsiortut neriulluarput

Air Greenlandimit, Namminersorlutik Oqartussanit suliffeqarfinnillu assigiinngitsunit aallartitat Davis-strædi qulaallugu sapaatip akunnera kingulleq paasisassarsioriarput.

Greenland Petroleumimi pisortaq Martin Ben Shalmi, Air Greenlandip aallartitaasa ilagaat. Ben Shalmilu suliffeqarfinnik assigiinngitsunik nunatsinni pilersitsinissamik soqutigisalinnik, naapeqateqarnissaq siunertaralugu peqataavoq.

Toqqaannartumik timmisartoqartalersinnaaneq piffissamik annertuumik sipaarfiullunilu niueqatigiinnerunissamut periarfissiissagaluartoq taanna isumaqarpoq.

- Toqqaannartumik timmisartoqartalersinnaaneq pingaaruteqarluinnarpoq. Ullumikkut Canadamut ataatsimiigiarnissamut ullut tallimat angalanermut atortarpagut, Islandimi unnueqqaartariaqaratta. Tamanna pisariusaqaaq. Kalaallit Nunaat Canadallu akornanni toqqaannartumik timmisartoqartalertuuppat, tamanna niueqatigiilluarnerunermik kiisalu nioqqutissarpassuarnik timmisartukkoortitsisinnaanngornermik periarfissiissagaluarpoq. Iluassaqaaq, Martin Ben Shalmi oqarpoq.

Aammattaaq Royal Arctic Line A/S-imiit Kalaallit Nunaat Canadallu akornanni toqqaannartumik timmisartorsinnaaneq, ukiut qulit matuma siornatigornit naleqqiullugu, massakkut imminut akilersinnaanerussasoq ilimagineqarpoq.

- Tassa neriunnassaaq. Atorneqartorujussuanngortussaassagami. Uaguinnaanngitsoq, aamma sullitagut periarfissaginnerussapput taamatut, Royal Arctic Line A/S-imi atuisunik kiffartuussinermi pisortaq, Lars Borris Pedersen oqarpoq,

Toqqaannartumik timmisartuussisalernissap pingaaruteqarnera takornariaqarnermi ingerlatsivimmit isumaqatigineqarpoq. Nunatsinni takornariaqarnermi inuussutissarsiornermilu siunnersuisoqatigiinni attaveqaqatigiinnermi pisortaq Anders LaCour Vahl ima oqarpoq:

- Kalaallit Nunaata, suliffeqarfinniit Canadameersunit Amerikallu avannarlerneersunit soqutiginartinneqarnera ilisimavarput. Soqutiginnittullu taakku, Kalaallit Nunaat Canadallu akornanni toqqaannartumik timmisartuussisoqartalersinnaanera, qanoq qisuariarfigissaneraat pissanganarpoq, Anders LaCour Vahl oqarpoq.

Taassuma toqqaannartumik timmisartuussisoqartalernissaanut piffissaq eqqortuusoraa.

- Aap, taama isumaqarpunga, tassami Kalallit Nunaat massakkut nutaarsiassatigut takornariaqarnerullu tungaatigut tusaamaneqarnerulernikuuvoq, Anders LaCour Vahl oqarpoq.

Kalaallit Nunaata Canadallu akornanni toqqaannartumik timmisartuussisarnerit 2001-imi unipput, Air Greenlandimiillu timmisartuussisaleqqinnissaq 2011-mi pilersaarutigineqanngikkallarluni.

Tassuunaarussisaleqqittoqassappalli siusinnerpaamik 2012-imi 2013-imiluunniit Kalaallit nunaat Canadallu akornanni timmisartuussisaleqqittoqarsinnaassalluni.