Inuussutissarsiortut Jyllandip avannaaniittut Greenland Expressip pakatsiffigaat
- Maannamut mittarfimmit imaluunniit inuussutissarsiortunit tapersersorneqarsimanngilagut. Takusinnaavarput ilaasorisimasatta 90 procentii Københavnimeersuusimasut, Nordjyskimullu oqarluni Aalborgip mittarfiata Greenland Express piseqqusaarnerusariaqarsimagaluaraa.
Aalborg Lufthavnilli pisortaata Søren Svendsenip mittarfeqarfiup nittarsaassinerusimannginnera eqqunngitsuunerarpaa, ugguarlunilu toqqaannartumik Jyllandip Avannaanit Kalaallit Nunaannut timmisartup ingerlaartannginnera.
AAMMA ATUARUK Greenland Expressip timmisartuussinerit unitsikkallarpai
- Kipparissumik oqaatigalugu toqqaannartumik Kalaallit Nunaannut suli timmisartuussisimanngilaq. Tapersersuinitsinnut peqqutaasimavoq Jyllandip Avannaanut assut pingaaruteqarsimassagaluarmat, timmisartuusinerili arlaannaaluunniit toqqaannartuusimanngilaq, Søren Svendsen oqarpoq.
Greenland Expressip pisortaa Gert Brask naapertorlugu, ilaasut ikippallaartarneri aammalu Islandikkoortariaqarnerup akisuallaarnera pissutigalugu timmisartuussisarnerit unitsikkallarneqarput. Greenland Ekspressip timmisartoq Fokker 100 maannamut atoraluarpaa, taannali atlantikup avannaa toqqaannartumik ikaarsinnaanngilaa, taamaattumillu Islandimut aqqusaartariaqartarluni. Gert Brask Airbusimik attartornissaq maanna siunniussimavaa.
