Inuussutissaqarnermi nakkutilliisoqarfik Narsamiittariaqarpoq

Kalaallit Nunaanni inuussutissanik tuniniaanissani peqqinnissamut nakkutilliisoqarfik Namminersornerullutik Oqartussat akisussaaffigaat.

Nunarpulli inuussutissanik nunanut allanut tuniniaassappat Danmarkip Fødevarestyrelseata akisussaaffik tigummivaa.Taamaasilluni nunatsinni inuussutissanik nioqquteqarnermi nakkutilliinerit nunatta Danmarkimilu Inuussutissaqarnermut ministereqarfiullu 1992-imili aveqatigiissimavaat.

Politikerit arlallit oqartussaassuseqarnerup tamarmiusup nunatsinnut nuunneqarnissaa taannarisarpaat, iliuuseqartoqartaranili.

Maanna Kommune Kujalliup piumasaraa inuussutissanik nioqqutissiornermi nakkutilliisoqarfiup Narsamut nuunneqarnissaa. Peqqutaatinniarneqarpoq Inuussutissalernermik Ilinniarfiup Narsameereernera.

- Iliuuserineqarsinnaasoq pitsaanerpaavoq. Inuussutissanik nioqquteqarnermi nakkutilliisoqarfik, aalisarnermik ilinniarfiit tunisassiaasa nakkutigineqarnissaat ataatsimoorfeqalertariaqarpoq.

Uumasut nakorsaqarfii nakkutilliiviusut Ilulissani, Qaqortumi, Nuummilu inissisimapput.

Simon Simonsen isumaqarpoq Narsami qitiusumik nakkutilliisoqarfeqaleraluarpalluunniit nunap immikkoortuini pingasuni pioreersut attatiinnarneqartariaqarneri.

- Avaqqunneqarsinnaanngilaq nunap immikkoortuini nakkutillisoqaannarnissaa.

Ataatsimut aqutsisoqarfik allaffeqarfillu Narsami pilersinneqarsinnaapput.

Maanna uumasut nakorsaasa qullersaata Mads Thorip Savalimmiuni aaqqissuussisimaneq misissuataariffigilerpaa.

Uumasut nakorsaasa pisortaata missingissersorpaa oqartussaassuseqarfik tamakkiisumik akisussaaffigilissagaanni 12 millionit 16 million kronillu missinginik akeqassasoq, aalisakkanik tunisassiornermi nakkutilliisoqarfik Danmarkimit suli oqartussaaffigineqartoq ilanngunnagu.

Taamatut aaqqissuussisoqassappat uumasut nakorsaat, inuussutissalerisullu amerlanerit atorfinitsinneqartariaqarput, misissuisarfiillu annertusineqarlutik. Malitsigissavaalu nunap immikkoortuini pingasuusuni nakkutilliisoqarfiit amerlinissaat.

Ilanngullugu nunanut allanut tuniniaasarnerni oqartussaaffeqarnerup tigunerani EUp malittarisassaanut, killeqarfinnillu nakkutilliinernik naleqqussaasoqartariaqarpoq.