Inuuniarneq Qaasuitsup Kommuniani akisuneruvoq
Kommunini sisamaasuni ilaqutariit qanoq aningaasatigut atugaqarsinnaanerannik assersuutit takutippaat Qaasuitsup Kommuniani najugaqarneq akisunerpaasoq, Kommune Kujalleq akisunerpaat tulleralugu. Kommuni inuuniarfigissallugu akikinnerpaaq tassaavoq Kommuneqarfik Sermersooq, Qeqqata Kommunia akikinnerpaamut tulliusoq.
Atuagagdliutit misissuinerminni aappariit - aappaa ilinniagaqanngitsoq aappaalu ilinniagalik, tamarmik SIK malillugu akissarsiallit, aallaavigai. Aappariit pingasunik meeraqarput, marluk atuartut ataaserlu meeraaqqerivimmiittoq, taakkulu tamarmik naatsorsuusiornermi assersuusiarineqarput.
Aappariit akileraarut suli peernagu qaammammut 31.203 koruuninik akissarsisarput. Akileraareeraangata, INI-mut akiliut, boligsikringi ilanngullugu aamma meeraaqqerivimmut akissarsianit ilanngaataareeraangata, ilaqutariit ulluinnarni akiligassannut allanut inuuniarnerminnilu atugassaattut sinneruttut tassaapput, Qaasuitsup Kommuniani 14.071 koruunit Kommuneqarfik Sermersuumi kisitsit 2.500 koruuninik annerusoq.
Atuagagdliutit pisuusaartitsillutik ilaqutariit aningaasatigut atugaannik misissuinerat immaqa piviusuinnut ungasissinnaavoq, kisianni sinerissami akigititat aallaavigalugit kommunini sisamaasuni inuuniarnerup qanoq akikitsigaluniluunnit akisutigisinnaaneranik takutitsivoq.
