Inuunermik allanngortitsinissamut kajumissaat

"Gør Maj Sund"-ip nittartakkamini allassimanera naapertorlugu "siunertaraa akeqanngitsumik timersorfiusinnaasunik amerlanerpaanik, inunnit amerlanerpaanit ajornannginnerpaanik peqataalluarfiulluartussanillu - Kalaallit Nunaanni tamarmi qanorluunniit ukioqartunut neqerooruteqarnissaq".

- Nuannaarutigalugulu tulluusimaarutigeqaarput sammisaqartitsinivut tamarmik soqutigineqarluarmata, naak maaji qaammat apiuarlunilu nilleraluaqisoq,  Morten Jørgen Heilmann oqarpoq.

Taanna qatanngunni Parnûna uialu Jesper Olesen peqatigalugit "Maaji Peqqissuutiguk"-mi komitéupput. Pikkori Sportimi sulisut pisussanik aqutsipput, allallu qulit missanniittut kajumissutsiminnik pisussani suleqataapput.

- Tamarmik timersoqataarusulersitsisuupput - meeraaqqaniit utoqqarnut - peqataarusupput. Timersuutimmi assigiinngitsut misilissinnaasaat ukiormanna amerlaqigamik - miniput-iniit senior-inut naleqquttut, nangippoq.

Siorna peqataasut peqataanermik nalaanni sumut peqataanertik kinaanertillu allassimagunikkit qaammatip naanerani makitsinernut peqataasinnaasimapput, ilaatigut sikkilit, akeqanngitsumik timersoriarsinnaanernut koortit allallu eqqorsinnaasimallugit. Ukiormannali taamaaliortoqanngikkaluarmat apeqqutigineqarsimanngilaq.

- Nuanneqaaq taamaannera. "Makitsinissamut kajumissaat" apeqqutigineqanngilaq. Paasiinnarparput "Maaji Peqqissuutiguk"-mi pisut innuttaasut peqataaffigerusuissimagaat. Aammami ilaquttatik ikinngutitillu ilagisinnaasaramikkit, allaallu ilisarisisartaarsinnaallutik, Morten Jørgen Heilmann nassuiaavoq.

Aaqqissuisut aamma nuannaraat, "Maaji Peqqissuutiguk" illoqarfinnut arfineq-pingasuni, nunaqarfinnilumi maanna ingerlanneqartalermat.

- Peqqinnartumik timilu aalatittarlugu inuuneqalernissamik Kalaallit Nunaannut kajumissaarinerput kikkorpassuit malilersimavaat. Tamatsinnut iluaqutaaginnassaaq, oqarpoq.

"Gør Maj Sund"-ip nittartagaani qaammatip sinnerani pisussat alakkartersinnaavatit.