Inuunermi misigisaq puigunaatsoq

FC Københavnip aamma FC Barcelonap Champions Leaguemi anngunniunnernut atatillugu ippassaq unamminerat inunnit 37.000-init isiginnaarneqartoq kalaallinit isiginnaarianit alutorsaatigineqaqaaq.

Erneriit Mikkel aamma Inunnguaq Olsen puigugassarinngisaminnik misigisaqarput. Ukiorpassuarni FC Barcelonamik illersuisuujuarsimasoq Mikkel Olsen, feeriarnini iluatsillugu Nuummiit isiginnaariarpoq.

Qanittoruarsuanngorlugit takuagut, Messi, Xavi, Puyolikkut taavalu Iniestakkut uungaararsuaq isiginnaarpagut. Fjernsynikkut isiginnaartuarnikuullutigit taama qanitsigalugit takullugit nuannersorujussuuvoq alutornarlunilu, Mikkel Olsen oqaluttuarpoq.

FC Københavnip illersuisuisa 37.000-inik amerlassusillit nilliasarnerat aamma tupinnartupilussuunerarpaa.

- Nipi sakkortoqaaq misigisarlu nuannersupilussuulluni, Mikkel Olsen oqarpoq.

Inunnguaq Olsen, Ålborgimi sanasutut ilinniartoq, isiginnaakkaminut puigunaatsorsisimasoq ima oqarpoq:

- Iseqqaarmata nuannaangaarama qiangajappungaluunniit. Qanimut takunerat upperinngeqqaaraluarpara, ataataga oqarfigisaqattaarpara ”Barcelonakkut isiginnaarpagut”. Målingajaqattaarneri aamma driblertarneri, Xavillu Iniestallu imminnut tunioraattarneri assut ingasassuaarput, Inunnguaq Olsen oqarpoq.

FC København aamma FC Barcelona unamminermini tamarmik ataatsimik isertitaqarput.