Inuunerinnerunissamut suliniuteqarnermut innuttaasut suleqatiserineqarput

Nuup kommunalbestyrelseani peqqinnerunissaq anguniarlugu politikki qanoq ittoq ingerlanniarneqarnersoq innuttaasunit sunniuteqarfigineqarsinnaalissaaq.
Allattoq Jaaku Lyberth
februaarip 15-at 2008 10:22

Ataatsimiititaliaq nutaarluinnaqqissaaq ippassaq pilersinneqarpoq taaguuteqarluni peqqinissamut pinaveersaartitsinermullu ataatsimiititaliaq.

Ataatsimiititaliap ataani siunnersuisoqatigiinnik pilersitsisoqassaaq innutaasunit inuttaqartinneqartussamik.

Ataatsimiititaliami siulitaasunngorpoq Lene Knuppel Demokraatineersoq.

Innutaasut ulluinnarni inuuneranni ajornartorsiutaasartut soorlu pualavallaanerit sukkornermillu nappaateqalersinnaanerat pinaveersaartinniarlugit timersornerit timigissartarnerit peqqinnerusumillu inooriaaseqalernissaat anguniarlugu innuttaasut suleqataanissaannut qaaqquagut, Lene Knuppel oqarpoq, taamaatumillu siunnersuisoqatigiinnik pilersitsiniarpugut innutaasut kommunalbestyrelsemi peqqinnerunissamik suliniuteqarneranni sunniuteqarfigisinnaasaannik.

Peqqinnissamut pinaveersaartitsinermilu ataatsimiititaliaq februaarip ulluisa 28-anni siullermeerluni ataatsimiissaq, tassanilu aalajangerneqassaaq innuttaasut siunnersuisoqatigiinni ilaasortarititassaat kikkunnik inuttaqartinneqassasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq