Inuuneq artornarsippat saaffigineqarsinnaasut
Imminut toqunnissaminnik siorasaarutit nuna tamakkerlugu agguaqatigiisillugit tallimaasarput, Nuummili sapaatip akunnerata kingulliup ingerlanerani tallimaasimallutik.
Inuunermilu artornartorsioraanni normut saaffiginniffiusinnaasut Nuummi politiit sapaatip akunnikkaartumik nalunaarusiaminni innersuussutigaat.
Normu saaffigineqarsinnaasoq ATTAVIK 146 innersuussutigineqarpoq. Tassa normu atimik isertuussilluni akeqanngitsumillu nuna tamakkerlugu saaffigineqarsinnaasoq.
Inuunerminni artornartorsiortut allatigulluunniit ajornartorsiuteqartut, imminullu toqunniarlutik siorasaaruteqartunut qanigisallit sianersinnaapput, soorlu aamma imminut toqussimasumut qanigisaasut normumut taassumunnga sianersinnaasut.
Taassuma saniatigut meeqqat inuusuttullu MIO-mut allassinnaapput, normumullu 1899-imut akeqanngitsumik aamma SMS-ersinnaallutik, ataasinngornermiillu tallimanngornermut ualikkut nalunaaqutaq sisamat arfinillillu akornanni aamma saaffiginnittoqarsinnaavoq, siunnersortimik oqaloqatiginnittoqarsinnaalluni.
Politiinullu toqqaannartumik aamma sianertoqarsinnaasoq, Nuummi politiit ilisimatitsissutigaat.
Imminut toqunnissamut sioorasaarisoqaraangat imigassartorsimaneq amerlasuutigut pissutaaqataasartoq politiit nalunaarutigaat, imigassap inuit isummakkut pissusiannut pitsaanngitsumik ilaatigut sunniuteqartarnera oqaatigalugu.
Inuttullu ajornartorsiortoqartillugu taamaammat imigassartortannginnissaq Nuummi politiit taamaammat kajumissaarutigaat.