Inuulluataarusukkaanni, taava Norgemi najugaqartariaqarpoq
Naalagaaffiit Peqatigiit nunat inuulluataarfiunerpaat allattorsimaffiannik suliaqarnermini Norge normu 1-nngorpaa. Danmarki siorna nr. 13-iusoq maanna normu 16-inngorsimavoq.
Allattoq Najaaraq Egede
oktobarip 05-at 2009 06:26
Naalagaaffit Peqatigiit ineriartortitsinermut suliniagaqatigiiffia UNDP-p allattorsimaffimmik suliaqarnermini ukiut inuuffiit, ilinniagaqarneq aamma isertitat nalilersuutinut ilaatittarpai.
Nalilersuinermi kisitsisit ukioq 2007-imeersut atorneqarput. Norgep inuulluataarfiunerpaatut toqqarneqartup tullerai Australia Islandilu. Islandip inuulluataarfiunerpaanut ilaanera aningaasaqarnerata ajutoornera sioqqullugu naliliineruvoq. Allattorsimaffimmi Kalaallit Nunaat ilaanngilaq, nunarput immikkut naalagaaffiunnginnini pillugu Naalagaaffiit Peqatigiinnut ilaanngimmat.
Allattorsimaffiup naqqani nunat inuulluataanngiffiunerpaat tassaapput Niger, Afghanistan aamma Sierra Leone.
